Թուրքիայի վեց կուսակցություններից բաղկացած ընդդիմադիր դաշինքը փետրվարին կհայտարարի նախագահի իր թեկնածուի մասին՝ մայիսին նշանակված ընտրություններում նախագահ Թայիփ Էրդողանի 20-ամյա իշխանությունը վիճարկելու նպատակով, հաղորդում է Reuters լրատվական գործակալությունը:
«Նախագահի թեկնածուի անունը հավանաբար կհայտարարվի փետրվարին», - լրագրողներին ասել է Ժողովրդահանրապետական կուսակցության (CHP) ղեկավար Քեմալ Քըլըչդարօղլուի խորհրդական Ունալ Չեւիքյոզը։
Վեց կուսակցությունների դաշինքը նպատակ ունի ստեղծել միասնական հարթակ, սակայն դեռեւս պետք է համաձայնության գա թեկնածուի շուրջ՝ առաջիկա ընտրություններում Էրդողանին մարտահրավեր նետելու համար:
Չեւիքյոզը հայտնել է, որ ընդդիմադիր վեց կուսակցությունների առաջնորդները հունվարի 30-ին կներկայացնեն իրենց առաջարկները խորհրդարանական համակարգին անցումային շրջանի եւ ապագա կառավարության ծրագրի վերաբերյալ։