Գերմանիան «չի կանգնի ճանապարհին», եթե Լեհաստանը կամ այլ դաշնակիցներ դիմեն Ուկրաինա գերմանական Leopard տանկեր ուղարկելու թույլտվության համար, հայտարարել է արտգործնախարար Անալենա Բերբոքը, գրում է Politico-ն։
Ավելի վաղ Լեհաստանի վարչապետ Մատեուշ Մորավեցկին հայտարարել էր, որ Լեհաստանը պատրաստ է Կիեւին Leopard տանկեր մատակարարել, ինչի համար կպահանջվի Գերմանիայի հավանությունը։ Մորավեցկին նույնիսկ նշել էր, որ Վարշավան պատրաստ է ուղարկել այդ տանկերն առանց Բեռլինի համաձայնության։
Սակայն Բերբոքն ընդգծել է, որ Լեհաստանը «դեռ մեզանից չի խնդրել» նման թույլտվություն։ «Եթե մեզ խնդրեին, մենք չէինք խանգարի»,- հավելել է նա։
Կիրակի օրը Փարիզում կայացած մամուլի ասուլիսում Գերմանիայի կանցլեր Օլաֆ Շոլցը խուսափել է տանկերի մատակարարման հարցին հստակ պատասխան տալուց՝ փոխարենը ընդգծելով, որ Բեռլինը երբեք չի դադարել աջակցել Ուկրաինային զենքի մատակարարման հարցում եւ որոշումներ է կայացրել՝ համագործակցելով իր դաշնակիցների հետ։
Մորավեցկին կիրակի օրը հայտարարել է, որ իր երկիրը պատրաստ է «փոքր կոալիցիա» ստեղծել՝ առանց Գերմանիայի մասնակցության Ուկրաինա տանկեր ուղարկելու համար: