Էստոնիան եւ Լատվիան որոշել են Ռուսաստանի հետ դիվանագիտական ​​հարաբերությունների մակարդակը նվազեցնել։ Տալլինը հայտարարել է, որ Ռուսաստանի դեսպանը պարտավոր է մինչեւ փետրվարի 7-ը լքել երկիրը։ Ավելի վաղ նման վերջնաժամկետ էր սահմանել Մոսկվան Էստոնիայի դեսպանի համար։ Լատվիան նվազեցնում է Ռուսաստանի հետ դիվանագիտական ​​հարաբերությունների մակարդակը՝ «ի նշան համերաշխության Էստոնիայի հետ»։

Էստոնիան Տալլինում Ռուսաստանի դեսպան Վլադիմիր Լիպաեւից պահանջել է լքել երկիրը մինչեւ փետրվարի 7-ը։ Այս մասին Twitter-ում հայտնել է Էստոնիայի ԱԳ ղեկավար Ուրմաս Ռեյնսալուն։

Ռեյնսալուն նշել է, որ Էստոնիան ի գիտություն է ընդունում Էստոնիայում իր դիվանագիտական ներկայացուցչությունը ժամանակավոր պաշտոնատար անձի աստիճանի նվազեցնելու մասին Ռուսաստանի որոշումը՝ հիշեցնելով, որ Տալլինը չի հրաժարվում Մոսկվայի հետ հարաբերություններում հավասարության սկզբունքից։

«Սա նշանակում է, որ Տալլինում Ռուսաստանի դեսպանը կմեկնի Էստոնիայի դեսպանի հետ միաժամանակ»,- ասել է Էստոնիայի նախարարը։

Լատվիան նույնպես կնվազեցնի Ռուսաստանի հետ դիվանագիտական ​​հարաբերությունների մակարդակը, Twitter-ում հայտնել է Լատվիայի արտաքին գործերի նախարար Էդգարս Ռինկեւիչսը։ Նա գրել է, որ նման որոշում է կայացվել Ուկրաինայում Ռուսաստանի շարունակվող գործողությունների պատճառով եւ «ի նշան համերաշխության Էստոնիայի հետ»։ Որոշումը կգործի փետրվարի 24-ից։