Մարոկկոյի օրենսդիրները կողմ են քվեարկել Եվրախորհրդարանի հետ հարաբերությունների վերանայմանը՝ նրան մեղադրելով միջամտության մեջ այն բանից հետո, երբ Եվրախորհրդարանը թագավորությանը մամուլի ազատությունը հարգելու կոչ անող բանաձեւ է ընդունել, հայտնում է AFP-ն։
Նիստից հետո արված հայտարարության մեջ Մարոկկոյի օրենսդիրները եվրոպական բանաձեւն անվանել են «անընդունելի հարձակում թագավորության դատական ինստիտուտների ինքնիշխանության, արժանապատվության եւ անկախության վրա»: Նրանք ասել են, որ այդ քայլը «լուրջ վնաս է հասցրել իրենց միջեւ հիմնարար վստահությանը»:
Արդյունքում Մարոկկոյի խորհրդարանը «որոշել է վերանայել իր հարաբերությունները Եվրախորհրդարանի հետ եւ դրանք ներկայացնել ընդհանուր գնահատման համար»,- ասել է Ներկայացուցիչների պալատի խոսնակ Ռաչիդ Թալբի Ալամին: Այլ մանրամասներ նա չի հայտնել։
1996 թվականի համաձայնագրով Մարոկկոյի եւ Եվրամիության միջեւ սերտ տնտեսական եւ առեւտրային հարաբերություններ են հաստատվել, հատկապես գյուղատնտեսության եւ ձկնորսության ոլորտներում:
«Նրանց որոշումները մեզ չեն վախեցնի, եւ մենք չենք պատրաստվում փոխել մեր ուղին ու մոտեցումը»,- ասել է «Անկախների ազգային միավորման»՝ Մարոկկոյի իշխող կոալիցիայի ամենամեծ կուսակցության նախագահ Մուհամմեդ Գիաթը:
Ստրասբուրգում եվրոպացի օրենսդիրները Մարոկկոյին կոչ են արել «հարգել խոսքի եւ լրատվամիջոցների ազատությունը» եւ «ձերբակալված լրագրողների համար արդար դատավարություն երաշխավորել»:
