Nord Stream 2 AG-ի գործադիր տնօրեն Մաթիաս Վառնիգը Zeit թերթին տված հարցազրույցում ասել է, որ Ուկրաինայում ռուսական հատուկ գործողության մեկնարկից հետո Մոսկվայում հանդիպել եւ զրուցել է Ռուսաստանի նախագահ Վլադիմիր Պուտինի հետ: Հարցազրույցից հատվածներ է ներկայացնում «ՌԻԱ Նովոստին»։
Գործակալությունը նշում է, որ այդ խոսակցության վկաներ չկան, սակայն, ըստ Վառնիգի, նա Ռուսաստանի նախագահին հարց է ուղղել, թե «որոնք են գործողության նպատակները»։ «Դուք ցանկանում եք Օդեսան, Խարկովը, ամբողջ Ուկրաինան կամ նույնիսկ ավելի՞ն»,-այդ ժամանակ ասել է Վառնիգը, որի խոսքերը մեջբերում է Zeit-ը։
Նրա խոսքով՝ Պուտինն այդ հարցին չի պատասխանել եւ ասել է, որ «դա պետական գաղտնիք է»։ Նշվում է, որ դա եղել է հատուկ գործողության մեկնարկից մի քանի ամիս անց։
ԱՄՆ ֆինանսների նախարարությունը անցյալ տարվա փետրվարին պատժամիջոցներ է սահմանել Nord Stream 2 AG ընկերության եւ հենց Վառնիգի նկատմամբ։ Անցյալ տարվա մայիսին Վառնիգը եւ Գերմանիայի նախկին կանցլեր Գերհարդ Շրյոդերը հայտնել են «Ռոսնեֆտի» տնօրենների խորհրդում իրենց լիազորությունների երկարաձգման անհնարինության մասին: