Ռուսաստանի նախագահ Վլադիմիր Պուտինը եւ Nord Stream 2-ի գործադիր տնօրեն Մաթիաս Վառնիգը ծանոթ են միմյանց, նրանք իսկապես զրույց են ունեցել, ասել է ՌԴ նախագահի մամուլի քարտուղար Դմիտրի Պեսկովը, տեղեկացրել է «ՌԻԱ Նովոստի»-ն։
«Ես միայն կարող եմ ասել, որ իսկապես Պուտինը եւ Վառնիգը ծանոթ են, եւ նրանք իսկապես հաղորդակցվել են»,- ասել է Պեսկովը՝ պատասխանելով լրագրողների այն հարցին, թե ճիշտ է արդյոք, որ Պուտինը եւ Nord Stream 2-ի գործադիր տնօրենը շփվել են հատուկ ռազմական գործողությունն սկսվելուց հետո, եւ արժե արդյոք սպասել, որ այդ շփումը կշարունակվի։
Հինգշաբթի օրն ավելի վաղ Վառնիգը Zeit թերթի հարցազրույցում ասել էր, որ Ուկրաինայում ռուսական հատուկ ռազմական գործողությունն սկսվելուց հետո Մոսկվայում հանդիպել եւ զրուցել է Պուտինի հետ։ Ըստ պարբերականի՝ այդ խոսակցության վկաներ չկան, բայց, հենց Վառնիգի խոսքով, ինքը Ռուսաստանի նախագահին հարցրել է, թե «որոնք են գործողության նպատակները»։
