Հնդկաստանում ուսանողներին սկսել են ձերբակալել վարչապետ Նարենդրա Մոդիի մասին BBC-ի վավերագրական ֆիլմը դիտելու համար, գրում է Foreign Policy-ն։
Ամերիկյան թերթը հայտնում է տասնյակ ձերբակալված ուսանողների մասին, հիմնականում մահմեդականներ, որոնք սովորում են Ջավահարլալ Ներուի անվան համալսարանում, ինչպես նաեւ Նյու Դելիի Ազգային իսլամական համալսարանում: Նշվում է, որ տեղի իշխանությունները միտումնավոր անջատել են քաղաքի այն թաղամասերի էլեկտրաէներգիան, որտեղ տեղակայված են եղել ուսումնական հաստատությունները՝ ֆիլմի ցուցադրմանը խանգարելու համար։
Հնդկաստանի իշխանությունների կողմից արգելված «Հնդկաստան. Մոդիի հարցը» վավերագրական ֆիլմն անդրադառնում է 2002 թվականին մահմեդականների եւ հինդուիստների միջեւ կրոնական բախումների ճնշմանը նրա մասնակցությանը: Այն ժամանակ Մոդին Գուջարաթի նահանգի ղեկավարն էր։
2002 թվականի փետրվարին հինդուական համայնքը եւ ուխտագնացները մեղադրել էին մահմեդականներին մարդատար գնացքը միտումնավոր հրկիզելու մեջ, որի հետեւանքով 58 մարդ էր զոհվել, եւ Գուջարաթիի Ահմեդաբադ քաղաքի մահմեդական անկլավներում ջարդեր էին սկսվել: Foreign Policy-ն նշում է, որ Մոդին այն ժամանակ հնդուիստամետ դիրքորոշում է ունեցել։
