Ֆրանսիան եւ Իտալիան մոտ են Ուկրաինային SAMP/T ԶՀՀ մատակարարելու տեխնիկական մասի ավարտին, հայտնում է Reuters-ը՝ վկայակոչելով երկու դիվանագիտական աղբյուրների՝ նշելով, թե դեռեւս պարզ չէ, թե որքան արագ վերջնական որոշում կկայացվի։
Կիեւն իր արեւմտյան դաշնակիցներից խնդրել է հակաօդային պաշտպանության լրացուցիչ համակարգեր եւ, մասնավորապես, SAMP/T, որը հայտնի է որպես Mamba:
Ֆրանսիայի պաշտպանության նախարար Սեբաստիան Լեկորնյուն ուրբաթ օրը կմեկնի Իտալիա՝ հանդիպելու իր իտալացի գործընկեր Գիդո Կրոզետտոյի հետ, եւ երկու կողմերը մտադիր են շարունակել բանակցությունները SAMP/T-ի շուրջ։
Համակարգը, որը կառուցվել է ֆրանկո-իտալական համատեղ կոնսորցիումի կողմից, կարող է հետեւել տասնյակ թիրախների ու միաժամանակ որսալ 10 հրթիռ, եւ եվրոպական արտադրության միակ համակարգն է, որը կարող է բալիստիկ հրթիռներ որսալ:
«Քաղաքական որոշում է կայացվել։ Տեխնիկական մանրամասները նոր են ավարտվում, քանի որ դա բարդ համակարգ է»,- ասել է դիվանագետը՝ հավելելով, որ, հավանաբար, Ֆրանսիայի նախագահ Էմանուել Մակրոնը եւ Իտալիայի վարչապետ Ջորջիա Մելոնին պաշտոնական որոշում կկայացնեն։
Նշվում է, որ տեխնիկական բանակցությունները շարունակվում են։
Ավելի վաղ Փարիզը Ուկրաինային մատակարարել էր արձակման շարժական համակարգով փոքր հեռահարության Mistral եւ Crotale զենիթային հրթիռներ, որոնք օգտագործվում են ցածր թռչող հրթիռներն ու ինքնաթիռները որսալու համար։
