Գերմանիայի ԱԳՆ-ն ստիպված է եղել պարզաբանումներ տալ իր ղեկավար Աննալենա Բերբոքի այն ռեզոնանսային խոսքերի վերաբերյալ, ըստ որոնց՝ Եվրոպան կռվում է Ռուսաստանի դեմ։
Եվրոպայի խորհրդի Խորհրդարանական վեհաժողովի (ԵԽԽՎ) հունվարի 24-ի նիստում Բերբոքը հայտարարել է. «Մենք պատերազմ ենք մղում Ռուսաստանի, այլ ոչ թե միմյանց դեմ»։
«Գերմանիայի արտաքին գործերի նախարարի այս արտահայտությունն ակնթարթորեն տարածվել է համաշխարհային ԶԼՄ-ներում՝ զարմանք եւ քննադատություն առաջացնելով»,- գրել է Bild գերմանական թերթը՝ նշելով, որ Բերբոքի այս խոսքերը տարբերվում են Գերմանիայի կառավարության դիրքորոշումից. կանցլեր Օլաֆ Շոլցը քանիցս ընդգծել է, որ Գերմանիան չպետք է պատերազմի մասնակից դառնա։ Պատասխանելով պարբերականի հարցմանը՝ Գերմանիայի ԱԳՆ-ն պարզաբանումներ է տվել Աննալենա Բերբոքի խոսքերի առիթով։
«Ռուսաստանը դաժան պատերազմ է վարում Ուկրաինայի դեմ։ Սա նաեւ պատերազմ է եվրոպական աշխարհակարգի եւ միջազգային իրավունքի դեմ։ Եվրոպայի խորհրդի Խորհրդարանական վեհաժողովի հունվարի 24-ի հանդիպման ժամանակ արտաքին գործերի նախարար Բերբոքն ընդգծել է, որ Եվրոպան պետք է միասին դիմակայի այդ պատերազմին»,- նշվել է նախարարության պատասխանում, որը մեջբերել է DW-ն։
«Միջազգային իրավունքը միանշանակ է,- նշվել է այնուհետեւ։- Ուկրաինային աջակցությունը՝ զավթողական ռուսական պատերազմի դեմ ինքնապաշտպանության իր անհատական իրավունքն իրականացնելիս, որն ամրագրված է ՄԱԿ-ի Կանոնադրությունում, Գերմանիային հակամարտության կողմ չի դարձնում»։ «Հավանաբար, վերջին արտահայտությունը ԱԳՆ-ի պաշտոնական պատասխանում նշում է այն մասին, որ Աննալենա Բերբոքը, այնուամենայնիվ, չափն անցել է ձեւակերպում տալիս»,- նշել է Bild թերթը։
Գերմանիայի կանցլեր Օլաֆ Շոլցը հունվարի 25-ին հավանություն է տվել Ուկրաինա Leopard 2 տանկեր մատակարարելուն՝ ընդգծելով, որ որոշումն ընդունվել է Գերմանիայի դաշնակիցների հետ «համաձայնությամբ եւ սերտ համագործակցությամբ։ Կանցլերը հավաստիացրել է, որ Գերմանիայի կառավարությունն այս սկզբունքին, որը, ըստ նրա, «թույլ է տալիս կանխել Ուկրաինայում պատերազմի վերածումը Ռուսաստանի եւ ՆԱՏՕ-ի միջեւ պատերազմի», հավատարիմ կմնա նաեւ հետագայում։
