Ցուցարարները երկուշաբթի օրը հավաքվել են Ինդոնեզիայի մայրաքաղաք Ջակարտայում Շվեդիայի դեսպանատան մոտ՝ դանիացի ծայրահեղ աջ քաղաքական գործիչ Ռասմուս Պալուդանի կողմից Ղուրանի այրման դեմ բողոքելու համար, հայտնում է BBC-ն։

Բացի այդ, ցուցարարները Ինդոնեզիայի կառավարությանը կոչ են արել ոչ միայն դատապարտել Ղուրանի այրումը, այլեւ բոյկոտել շվեդական ամեն ինչ։

Ավելի վաղ Պալուդանն այրել էր Ղուրանը Ստոկհոլմում՝ Թուրքիայի դեսպանատան մոտ։

Այս քայլը եւ բողոքի այլ ցույցերը հանգեցրել են լուրջ դիվանագիտական տարաձայնությունների Շվեդիայի եւ Թուրքիայի միջեւ:

Շվեդիային անհրաժեշտ է Թուրքիայի հավանությունը ՆԱՏՕ-ին անդամակցելու համար, որն այժմ սպառնալիքի տակ է:

Թուրքիայի նախագահ Ռեջեփ Թայիփ Էրդողանը վերջերս հայտարարել է, որ իր երկիրը կարող է հաստատել Ֆինլանդիայի հայտը, բայց ոչ Շվեդիայինը:

Այս ամիս հակաշվեդական այլ բողոքի ցույցեր են տեղի ունեցել Պակիստանում, Իրաքում, Իրանում, Աֆղանստանում եւ Լիբանանում։

Ջակարտայում Շվեդիայի դեսպանատունը հայտարարել է, որ Ղուրանի այրումը չի արտացոլում կառավարության տեսակետը:

Անցյալ տարվա փետրվարին Ուկրաինայում ռազմական գործողությունների մեկնարկից հետո եւ՛ Շվեդիան, եւ՛ Ֆինլանդիան ՆԱՏՕ-ին անդամակցելու հայտ են ներկայացրել։

ՆԱՏՕ-ի ցանկացած ընդլայնում պետք է հաստատվի բոլոր 30 անդամների կողմից, եւ Թուրքիան հունիսին կարծես համաձայնել էր Շվեդիայի եւ Ֆինլանդիայի առաջարկին:

Սակայն պաշտոնական հաստատումը հետաձգվել է: Թուրքիան Ստոկհոլմին ասել է, որ նա պետք է արտահանձնի քրդերին, որոնց ինքը ահաբեկիչներ է հայտարարել։

Շվեդիան օրենսդրական փոփոխություններ է կատարել, որոնք թույլ են տալիս Թուրքիայի կողմից պահանջվող հակաահաբեկչական ավելի կոշտ օրենքներ ընդունել:

Կառավարությունը նաեւ վերացրել է Թուրքիային ռազմական տեխնիկա վաճառելու արգելքը, որը մտցրել էր 2019 թվականին Սիրիայում Անկարայի ռազմական միջամտությունից հետո։

Սակայն Թուրքիան վրդովվել է, երբ քրդական խմբերը հունվարին Ստոկհոլմում կախել են Էրդողանի խրտվիլակը, այնուհետեւ այրել են Ղուրանը։

Դրանից հետո Թուրքիան չեղարկել է Շվեդիայի պաշտպանության նախարարի ծրագրված այցը երկիր։

Ըստ Reuters լրատվական գործակալության, ոստիկանությունից Պալուդանի ստացած թույլտվության մեջ ասվում է, որ նրա ցույցն ուղղված է իսլամի եւ Շվեդիայում խոսքի ազատության վրա ազդելու Թուրքիայի նախագահ Ռեջեփ Թայիփ Էրդողանի փորձերի դեմ։