Վրաստանի նախկին նախագահ Միխայիլ Սաակաշվիլին չորեքշաբթի դատական նիստի ժամանակ հայտարարել է, որ ցանկանում է, որ իրեն հուղարկավորեն Ուկրաինայում, հաղորդում է ՏԱՍՍ-ը։
«Ես միանգամայն վստահ եմ մեր հաղթանակի մեջ, սակայն եթե չտեսնեմ այդ հաղթանակը, որն այդքան մոտ է, իմ սիրտը պետք է թաղվի Կիեւում։ Այն պատկանում է Ուկրաինային»,-ասել է Սաակաշվիլին Թբիլիսիի մասնավոր «Վիվամեդ» կլինիկայից տեսակապի միջոցով։
Սաակաշվիլու ելույթը ուկրաիներենից թարգմանել է դատարան հրավիրված թարգմանչուհին։ Ելույթի ավարտից հետո Վրաստանի նախկին նախագահը բարձրացրել է ukrainian գրությամբ իր շապիկը եւ մասամբ մերկացրել որովայնը՝ ցույց տալու համար, թե որքան վատ է իրեն զգում: Սննդի եւ դեղորայքի հասանելիությոան մասին դատավոր Գեորգի Արեւաձեի հարցին Սաակաշվիլին դրական է պատասխանել։
Թբիլիսիի քաղաքային դատարանը հերթական նիստն է անցկացնում՝ կապված առողջական վիճակի պատճառով նրան ժամանակավորապես կամ ամբողջովին ազատ արձակելու մասին փաստաբանների միջնորդության հետ:
Անցյալ տարի «Էմպատիա» ոչ կառավարական կազմակերպության փորձագետները Սաակաշվիլու օրգանիզմում հայտնաբերել էին ծանր մետաղներ, այդ թվում՝ սնդիկի հետքեր։ Նրանց տվյալներով՝ քաղաքական գործչի մոտ հայտնաբերվել է 10 ախտորոշում, որոնք անհամատեղելի են բանտարկության հետ։ Վրաստանի արդարադատության նախարարության հատուկ քրեակատարողական ծառայությունում հայտնել են, որ անալիզները ցույց են տվել թունավոր նյութերի բացակայությունը։ Վրաստանի իշխանությունների դիրքորոշումն այն է, որ նախկին նախագահը վատառողջ է ձեւանում։ Թբիլիսիի քաղաքային դատարանն անցյալ տարվա դեկտեմբերից քննարկում է Սաակաշվիլուն առողջական վիճակի պատճառով ազատ արձակելու մասին պաշտպանության միջնորդությունը:
