Չեխիայի նոր նախագահ Պետր Պավելը Blesk պարբերականի հետ զրույցում ասել է, որ Ուկրաինան ապագայում պետք է դառնա ՆԱՏՕ-ի եւ Եվրամիության անդամ։
Պետության ղեկավարին հարցրել են, թե արդյոք մտադիր է մասնակցել Վիլնյուսում ՆԱՏՕ-ի գալիք գագաթաժողովին, եւ արդյոք նա ակտիվորեն հանդես կգա Ուկրաինան Հյուսիսատլանտյան դաշինքում ընդունելու օգտին։
«Այո, մտադիր եմ։ Համակարգված մոտեցման շրջանակում՝ այո (հանդես կգա Ուկրաինան ՆԱՏՕ-ի կազմում ընդգրկելու օգտին)։ Իմ կարծիքն այն է, որ Ուկրաինան ապագայում պետք է մտնի ինչպես ՆԱՏՕ-ի, այնպես էլ Եվրամիության կազմ»,- ասել է Չեխիայի նախագահը։
Նա նաեւ տեղեկացրել է այս գարնանը նախատեսված՝ Ուկրաինա այցելության մասին։ Ենթադրվում է, որ դա լինելու է համատեղ այց Սլովակիայի նախագահ Զուզանա Չապուտովայի հետ միասին։
Ինչպես նշել է Պավելը, այդ ուղեւորությունը «պետք է դառնա Ուկրաինային հստակ աջակցության արտահայտություն», քանի որ «չի կարելի թույլ տալ, որ երկիրը անհաջողության մատնվի» զինված հակամարտությունում։
«Նրա հաջողությունը բխում է մեր եւ ԵՄ-ի ու ՆԱՏՕ-ի գծով մեր բոլոր դաշնակիցների կենսական շահերից»,- նշել է նա։
