Մենք լինելով պատերազմի մեջ, մեր իշխանությունները, ցավոք, հոգեբանական ճնշման են ենթարկում ամբողջ հասարակությանը՝ մի պարզ հարց տալով՝ դուք պատերազմ եք ուզո՞ւմ: Այս մասին այսօր՝ փետրվարի 3-ին, «Միացյալ Հայաստան» կուսակցության կազմակերպած «Պատերազմ եւ անվտանգություն» խորագրով քննարկման ժամանակ նշեց կուսակցության նախագահ Երվանդ Թարվերդյանը:
«Մենք չենք ուզում պատերազմ, բայց մենք պետք է պատրաստ լինենք ու չվախենանք պատերազմից: Որովհետեւ ինչքան էլ մենք ձգտում ենք մեր հարաբերությունները կարգավորել երկու հարեւան պետությունների հետ, մենք չպետք է մոռանանք, որ նրանք թշնամի պետություններ են: Դա փաստ է:
Այո, հավերժ թշնամիներ չեն լինում, բայց պետք է դա բնական բանակցությունների արդյունքում արժանապատիվ խաղաղություն լինի, ոչ թե պարտադրված: Ընդհուպ մինչեւ ապառազմականացված պետություն դառնանք, որ հաճոյանանաք Ադրբեջանին կամ Թուրքիային», -ասաց նա:
Թարվերդյանը նաեւ նկատեց, որ պետք է հասկանանք, որ Հայաստանն ամբողջ հայության պատմական հայրենիքն է. «Միայն մենք չենք, որ պետք է Սփյուռքից ինչ-որ բան խնդրենք կամ ուզենք: Չգիտես ինչու մարդիկ արտերկրում զարմանում են, երբ հարցնում եմ՝ իսկ մենք ի՞նչ կարող ենք անել որպես պետություն, որպես հայրենիք: Շատերի մոտ, ցավոք, ամեն ինչը միայն նյութականով է արտահայտված, բայց մայրական սերը, որ հայրենիքը պետք է տա, անհրաժեշտ է: Ուշադրությունը մեր սփյուռքի հայրենակիցներին անհրաժեշտ է: Քանի որ առանց տնտեսության չի կարող պետությունն ուժեղ լինել ու պաշտպանվել, հայտարարում եմ պաշտոնապես, մեր պետությունը, ինչ-որ տեղ անգամ նավթային պետություններից հարուստ է»,-ընդգծեց նա:
