Հայաստանի իշխանությունները պարտավորություններ ունեն Արցախի բնակչության նկատմամբ։ Լաչինի միջանցքի արգելափակումն այն աղետալի իրավիճակի դրսեւորումներից մեկն է, որում հայտնվել է հայ ժողովուրդը։ Այս մասին փետրվարի 3-ին Ազգային ժողովում խորհրդարանական ընդդիմության նախաձեռնությամբ հրավիրված խորհրդարանական լսումների ժամանակ հայտարարեց Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանը։
Նրա խոսքով՝ այդ միջանցքը միշտ ծառայել է եւ շարունակում է ծառայել որպես հաղթաթուղթ Բաքվի ձեռքում։
«Փակելով ճանապարհը՝ Ադրբեջանը, ըստ էության, փորձում է հասնել հայերի վտարմանը Արցախից։ Հետեւաբար, Արցախի հայապահպանությունը պետք է դառնա պաշտոնական Երեւանի ռազմավարական առաջնահերթությունը»,-նշեց հոգեւորականը։
Այս համատեքստում արքեպիսկոպոսը նշեց, որ իր համար անհարմար է համեմատել ադրբեջանա-թուրքական տանդեմի համակարգված գործողությունները հայկական կողմի «անտրամաբանական եւ ապաշնորհ պատասխանի» հետ։
«Ծայրահեղությունից ծայրահեղություն։ Մաքսիմալիզմից՝ մինիմալիզմ։ Սկսեցին «պայքար մինչեւ վերջ»-ով եւ հասան «120 հազարը տանք հանուն 3 միլիոնի փրկության» կարգախոսի։ Բայց այդ 120 հազարը նույնպես հայեր են, եւ Հայաստանը նրանց նկատմամբ որոշակի պարտավորություններ ունի»,-կարծում է նա։
Արքեպիսկոպոսն ընդգծեց, որ ինքը միշտ քննադատել է երկրի ղեկավարությանը։ Այնուամենայնիվ, իրավիճակն այնքան բարդ է, որ գործող իշխանության հեռանալուց հետո խնդիրները միայն ավելի շատ կլինեն։
«Ուստի պետք է գտնել ներկայիս ճգնաժամը հաղթահարելու ուղիները։ Մեզ պետք են «մահապարտներ» կառավարությունում, որոնք երկրորդ պլան կմղեն իրենց անձնական շահերն ու առաջին տեղում կդնեն պետության ու բանակի հզորացման հարցը։ Եթե դա տեղի ունենա, միջանցքը կբացվի»,-վստահ է Աջապահյանը։