ԱՄՆ-ն մտադիր է խորացնել համագործակցությունը Ադրբեջանի հետ։ Բաքվում Հարավային գազային միջանցքի խորհրդատվական խորհրդում այս մասին ասել է էներգետիկ դիվանագիտության հարցերով ԱՄՆ պետքարտուղարի տեղակալի խորհրդական Լաուրա Լոհմանը, հաղորդում է «ԱԶԵՐՏԱՋԸ»։
Նա նշել է, որ նախագահ Ջոզեֆ Բայդենը աջակցում է Կասպից ծովից Եվրոպա գազի արտահանմանը։ ԱՄՆ-ն աջակցել եւ կշարունակի աջակցել Հարավային գազային միջանցքի նախագծին` եվրոպացի գործընկերների էներգետիկ անվտանգությունը ապահովելու համար: «Հարավային գազային միջանցքը շատ կարեւոր նախագիծ է Եվրոպայի համար, եւ Ադրբեջանը առաջատար դեր ունի մայրցամաքի էներգետիկ անվտանգության ապահովման գործում։ Սակայն Հարավային գազային միջանցքը կարեւոր դեր է խաղում Եվրոպայի ոչ միայն էներգետիկ, այլեւ քաղաքական անվտանգության ամրապնդման գործում։ Այս նախագիծը հնարավորություններ է ստեղծում բազմաթիվ երկրների համագործակցության համար։ ԱՄՆ-ն կշարունակի աջակցել Կասպից ծովում արդյունահանվող բնական գազի Եվրոպա փոխադրմանը եւ օգնել Ադրբեջանին»,- ընդգծել է Լաուրա Լոհմանը։ Լաուրա Լոհմանը նշել է նաեւ, որ ԱՄՆ-ն, հաշվի առնելով աշխարհում առկա բնապահպանական խնդիրները, կարող է ներդրումներ կատարել Ադրբեջանում «կանաչ» էներգիայի արտադրության եւ արտահանման մեջ։
