Իսրայելի վարչապետ Բենիամին Նեթանյահուն պնդում է, որ Մերձավոր Արեւելքում շահերի վերաբերյալ փոխզիջում է գտել Ռուսաստանի նախագահ Վլադիմիր Պուտինի հետ, հայտնում է «ՌԻԱ Նովոստի» լրատվական գործակալությունը։

Իսրայելի վարչապետի խոսքով՝ Իրանը, իբր, ցանկանում է «բանակ» ստեղծել եւ այն տեղակայել Սիրիայում՝ Իսրայելի սահմանի մոտ։ Բացի այդ, Թեհրանը, նրա կարծիքով, «ձգտում է ոչնչացնել հրեական պետությունը եւ միջուկային զենքի մշակմամբ վտանգի ենթարկել նրա բնակիչներին»։

«Սկզբում ես Պուտինին ասացի. «Տեսեք, մենք կարող ենք ընտրել՝ կարող ենք գնալ առճակատման կամ ընդհանուր լեզու գտնել: Իսրայելն ազատ է գործում... Մենք չենք միջամտում ձեր գործողություններին Սիրիայում, իսկ դուք մեզ եք հանգիստ թողնում»։ Մենք փոխզիջում ենք գտել, որը ծառայում է Իսրայելի շահերին, եւ Պուտինը կարծում է, որ դա չի սպառնում ռուսական շահերին»,- ասել է Նեթանյահուն ֆրանսիական LCI հեռուստաալիքին։

Քաղաքական գործչի մատնանշմամբ, ինքն ու Պուտինը որոշել են «իրար հանգիստ թողնել»։

Ավելի վաղ Նեթանյահուն նշել էր, որ Իսրայելը չի ​​ցանկանում ռազմական առճակատման գնալ Ռուսաստանի հետ։

Միաժամանակ նա խոստովանել է, որ երկու երկրները «բարդ հարաբերություններ» ունեն։ Նրա խոսքով՝ դա պայմանավորված է նրանով, որ Սիրիայի հետ սահմանին իսրայելական ու ռուսական ինքնաթիռները թռչում են միմյանցից «թքելու հեռավորության վրա»։ Նեթանյահուն նշել է, որ Թել Ավիվը օդում գործողությունների ազատության կարիք ունի, սակայն դա կարող է հանգեցնել Մոսկվայի հետ առճակատման՝ ընդգծելով, որ իրադարձությունների նման զարգացում չի ցանկանում։