2026 թվականից Ford-ը, ավելի քան 20 տարվա ընդմիջումից հետո, կրկին կներկայացվի «Formula 1»-ում՝ Oracle Red Bull Racing եւ Scuderia AlphaTauri թիմերի հետ համագործակցությամբ, որոնք կհամալրվեն Red Bull Ford Powertrains-ով, գրում է Motor-ը եւ հավելում, որ «Blue Oval»-ը ներկայացրել է մի շարք նոր մոդելներ։

Դրանք կներառեն բենզինային եւ էլեկտրական շարժիչներով ճանապարհային եւ մրցարշավային մեքենաներ: Ford-ի գործադիր տնօրեն Ջիմ Ֆարլին, ով բրենդի վերադարձը «Formula 1» համարել է «Ford Performance»-ի նոր դարաշրջանի սկիզբը, շնորհանդեսի ժամանակ հայտարարել է միանգամից երեք նոր մոդելի մասին։

Դրանցից առնվազն մեկը կհամալրվի ամբողջությամբ էլեկտրական շարժիչային համակարգով։ Ford-ը վերջին սերնդի Mustang սպորտային մեքենայի նոր մրցարշավային մոդիֆիկացիան կկատարի։ Ranger պիկապների շարքում կհայտնվի արտաճանապարհային լուրջ տարբերակ, իսկ էլեկտրական մեքենաների շարքում կհայտնվի F-150 Lightning էլեկտրական պիկապի նոր տարբերակը։

Շնորհանդեսի ընթացքում Mustang Mach-E 1400, Mustang Cobra Jet 1400, Pro Electric SuperVan եւ F-100 Eluminator մոդելների նախատիպերի կողքին ներկայացված է պիկապի խորհրդավոր տարբերակը։

Ներկայումս Ford F-150 Lightning-ի ամենահզոր սերիական տարբերակը երկշարժիչային մոդիֆիկացիան է՝ 571 ձիաուժ հզորությամբ։