Զորամասի կացրանում հրդեհից հետո կառավարության նիստում վարչապետ Նիկոլ Փաշինյանն ընդգծել է, որ դեպքի վայրում հակահրդեհային կանոնները չեն պահպանվել. Ես հռետորական հարց եմ տալիս՝ իսկ այդ վայրում ընդհանրապես որեւէ կանոն գործե՞լ է, որ մի հատ էլ հրդեհային անվտանգության կանոնները չեն գործել: Այս մասին այսօր՝ փետրվարի 8-ին, մամուլի ասուլիսի ժամանակ նշեց Ազատ գյուղում զորամասի կացարանի հրդեհի հետեւանքով զոհված 15 զինծառայողներից 13-ի ծնողների լիազոր ներկայացուցիչ, փաստաբան Նորայր Նորիկյանը:
«Այդ նույն նիստում ՊՆ նախարար Սուրեն Պապիկյանը զեկուցել է, որ հրդեհի նախնական վարկածի համաձայն հրդեհային անվտանգության կանոնների խախտման հետեւանքով է տեղի ունեցել բռնկումը, որի ժամանակ արգելված միջոց՝ ավտոբենզին է կիրառվել: Նաեւ Պապիկյանը զեկուցել է, թե քանի պաշտոնատար անձ է ազատվել պաշտոնից: Այդ պաշտոնանկություններից օրինական է միայն կորպուսի հրամանատարին ազատելու հանգամանքը, օրենքը առանց որեւէ սահմանափակման այդպիսի հնարավորություն տալիս է վարչապետին՝ համապատասխան միջնորդագիր ՀՀ նախագահին ներկայացնելու: Իսկ մնացած զինվորականների դեպքում, այսինքն բոլոր այն զինվորականները, որոնք ազատվել են Փաշինյանի ցուցումով եւ Պապիկյանի հրամանով, օրենքը նման բան չի նախատեսում»,-ասաց Նորիկյանը:
Նրա խոսքով, այդ պաշտոնանկություններն արվել են հանրության զայրույթը մեղմելուց դրդված. «Բայց մենք դրանով չենք նպաստել այս գործի բացահայտմանը: Կարծում եմ՝ պետք էր զրկել որեւէ մեկին ինչ-որ ենթադրյալ հիմքերով իրենց վերաբերյալ ապօրինություն ցույց տալը մատնանշելու հնարավորությունից»:
Նորիկյանը վկայակոչելով նախկինի փորձը, մտավախություն հայտնեց, որ այս գործի բոլոր հանգամանքները չեն բացահայտվի, մեղավորները չեն պատժվի, եւ հերթական անգամ կպատժվեն միայն սլաքավարները:
Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։
Այս դեպքի առնչությամբ քննչական կոմիտեի հաղորդագրության մեջ ասվում է. «19․01․2023թ-ին՝ ժամը 00։40-ի սահմաններում, անձնակազմի հիմնական մասը գտնվել է զորանոցում՝ քնած, իսկ 2 ժամկետային զինծառայող վարորդները գնացել են աղբյուրից ջուր բերելու։ Օրվա հերթապահը գտնվել է կացարանից քիչ հեռու գտնվող խոհանոցում և խոսել է բջջային հեռախոսով։ Այդ ընթացքում վաշտի պատասխանատու կապիտանը հերթապահ ժամկետային զինծառայողից հարցրել և տեղեկացել է վառարանը վառելու նպատակով ավտոկայանատեղիում՝ ինժեներական աշխատանքներ իրականացնող տեխնիկայի գործարկման սարքավորումը (մեկնարկիչը) լիցքավորելու համար նախատեսված ավտոբենզինի առկայության մասին։ Այնուհետև 5 լիտր տարողությամբ պլաստամսե տարայում գտնվող ավտոբենզինով փորձել է վառել վառարանը։
Այս հանգամանքը փաստվում է նաև վկաների տված ցուցմունքով առ այն, որ այդ հատվածում եղել է բենզինով լցված 5 լիտրանոց 10 տարա, մինչդեռ դեպքի վայրի զննությամբ այնտեղ հայտնաբերվել է 9-ը։
Վառարանն ավտոբենզին լցնելուց հետո բոց է բռնկվել, որի հետևանքով պատասխանատու կապիտանը, այրվածքներ ստանալով, մեխանիկորեն իր ձեռքի ավտոբենզինով լի տարան նետել է մի կողմ, որն ընկել է կացարանի մեջ, ապա տվյալ օրվա վերակարգում գտնվող մեկ այլ ժամկետային զինծառայողի հետ, ով նույնպես ստացել է այրվածքներ, մի կերպ կարողացել են դուրս գալ կացարանից։
Կացարանի ողջ տարածքով կրակի արագ տարածման հետևանքով զինծառայողները չեն կարողացել կացարանի մուտքով դուրս գալ, սակայն դրսում գտնվող պարտադիր ժամկետային զինծառայողները կարողացել են 2 ժամկետային զինծառայողի օգնել դուրս գալ զորանոցից։
Դրսում գտնվող ժամկետային զինծառայող վարորդներից մեկը «Ուրալ» մակնիշի ավոտմեքենայով երկու անգամ հարվածել է կացարանի պատին՝ անցք բացելու և համածառայակիցներին այնտեղից դուրս բերելու նպատակով, որի արդյունքում պատի որոշակի հատված քանդվել է։ Սակայն կրակի արագ տարածման պատճառով կացարանում գտնվող մյուս զինծառայողներին չեն կարողացել դուրս բերել, որի արդյունքում թվով 15 ժամկետային զինծառայողներ մահացել են։ Նրանց դիերը դուրս են բերվել հրդեհը մարվելուց հետո»։
