Ֆրանսիայի նախագահ Էմանուել Մակրոնն Ուկրաինայի նախագահ Վլադիմիր Զելենսկուն Փարիզ կատարած այցի ընթացքում պարգեւատրել է Պատվո լեգեոնի շքանշանով, ինչը հանրապետությունում ամենաբարձր պարգեւն է: Այս մասին Ֆրանսիայի նախագահը հայտնել է Twitter-ի իր էջում։
«Հարգանքի տուրք Ուկրաինային եւ նրա ժողովրդին։ Հարգանքի տուրք քեզ, սիրելի՛ Վլադիմիր, քո խիզախության եւ վճռականության համար»,-գրել է Մակրոնը ՝ գրառումն ուղեկցելով տեսանյութով, որտեղ պատկերված է պարգեւատրման պահը։
Փետրվարի 8-ին Զելենսկին այցելել է Մեծ Բրիտանիա, որտեղ հանդիպել է վարչապետ Ռիշի Սունակի հետ եւ ելույթ ունեցել կառավարությունում։ Նույն օրը երեկոյան նա մեկնել է Ֆրանսիա, որտեղ հանդիպում է ունեցել Մակրոնի եւ Գերմանիայի կանցլեր Օլաֆ Շոլցի հետ։
Փետրվարի 9-ին Զելենսկին ելույթ կունենա Բրյուսելում ԵՄ Խորհրդի գագաթաժողովում:
