Հարգանքով եմ վերաբերվում Հայաստանի եւ Իրանի միջեւ ռազմական ոլորտում բոլոր որոշումներին։ Այս մասին այսօր՝ փետրվարի 9-ին, «Հայ-իրանական հարաբերությունները ընդհանուր շահերի համատեքստում» թեմայով քննարկման ժամանակ ասաց Հայաստանում Իրանի արտակարգ եւ լիազոր դեսպան Աբբաս Բադախշան Զոհուրին։
Նրա խոսքով՝ ցանկացած որոշում կամ գործողություն, որը կայացվում կամ ձեռնարկվում է, տրամաբանության շրջանակներում է։
«Եթե անհրաժեշտ լիներ, օրինակ, որ Հայաստանի պաշտպանության նախարարն ինչ-որ բան հնչեցներ, ապա նա դա կաներ։ Նույնը վերաբերում է Իրանի պաշտոնյաների հայտարարություններին։ ԶԼՄ-ներում ռազմական ոլորտի մասին տեղեկատվության հրապարակումը չի բխում Հայաստանի եւ Իրանի շահերից։ Մի՛ շտապեք, պատմությունն ամեն ինչի կանդրադառնա»,-նշեց նա։
Նա վստահեցրեց, որ Թեհրանն ուշադիր հետեւում է սահմանային զարգացումներին, Իրանն ու Հայաստանը շատ սերտ համագործակցում են բոլոր ոլորտներում։
«Եթե կան հարցեր, որոնք չպետք է բացահայտվեն, այդպես էլ պետք է անել։ ԶԼՄ-ների համար դա կարող է հետաքրքիր լինել, եւ եթե ես անդրադառնամ ինչ-որ հարցերի, ապա հետաքրքրությունը կարող է աճել, բայց ավելի լավ է սահմանափակվել այն տեղեկատվությամբ, որը կա։ Կարեւոր է չվնասել Իրանի քաղաքականությանը, որը նա վարում է տարածաշրջանային հարցերում»,-հավելեց դեսպանը։
«Հայաստանի եւ Իրանի տարբեր հատվածներում մեր թշնամիները ցանկանում են տարբեր իրավիճակներ ստեղծել եւ պետության ղեկավարության ուշադրությունը շեղել այդ իրադարձությունների վրա։ Բայց դա չի բխում մեր շահերից, չի կարելի թույլ տալ նման իրավիճակների առաջացում»,-եզրափակեց դեսպանը։
