Անգլիական եկեղեցին դիտարկում է այն հարցը, թե արժե արդյոք դադարեցնել Աստծուն «նա» («he»` արական սեռ) անվանել։ Դա տեղի է ունեցել քահանաների դիմումից հետո, որոնք գենդերային չեզոք տերմիններ օգտագործելու թույլտվություն են խնդրել։
Եկեղեցին հայտնել է, որ գարնանն այդ հարցով հատուկ հանձնաժողով կստեղծի: Ցանկացած հնարավոր փոփոխություն, որը կնշանակի շեղում ավանդույթից, պետք է հաստատվի սինոդի՝ եկեղեցու որոշումներ կայացնող մարմնի կողմից:
«Սա նորություն չէ։ Քրիստոնյաները հնագույն ժամանակներից հասկացել են, որ Աստված ոչ տղամարդ է, ոչ՝ կին: Սակայն Աստծուն դիմելու տարբեր եղանակներ եւ Սուրբ Գրություններում նրա նկարագրությունները միշտ չէ, որ արտացոլվել են մեր աղոթքներում»,- ասել է Անգլիկան եկեղեցու ներկայացուցիչը:
Պահպանողական քննադատները կարծում են, որ նման փոփոխությունները կնշանակեն հրաժարվել եկեղեցու սեփական դոկտրինից: Նրանք դա հիմնավորում են նրանով, որ ավանդաբար Աստծուն անվանում են «հայր», եւ այս բառը չի կարող փոխարինվել «մայր» կամ «ծնող» բառերով՝ չկորցնելով իր իմաստը։