Լիբանանի մայրաքաղաք Բեյրութում մարդիկ դուրս են եկել փողոց՝ բողոքելու կենսապայմանների վատթարացման, բանկերի փակման եւ դոլարի փոխարժեքի բարձրացման դեմ, հայտնում է Ազգային լրատվական գործակալությունը։
Հաղորդվում է, որ ցուցարարները անվադողեր են այրում տարբեր շրջաններում, այդ թվում՝ բանկերի մոտ, ճանապարհները փակում են մեքենաներով եւ աղբատարներով։ Ճանապարհներին խցանումներ են։
Զայրացած ավանդատուներն այրել են նաեւ Լիբանանի բանկերի ասոցիացիայի ղեկավարի տունը, հայտնում է գործակալության թղթակիցը։
Լիբանանի քաղաքների եւ քաղաքամերձ շրջանների փողոցներում բողոքի ցույցերի ֆոնին բանակային ստորաբաժանումներ են դուրս բերվել՝ անկարգությունները կանխելու նպատակով։
Ցուցարարների թիվը չի նշվում։ Տեղեկություններ չկան նաեւ անկարգությունների ժամանակ տուժածների մասին։