Ծնողը դռնեդուռ է ընկել, որ մի բան իմանա, դեպքից մեկ ամիս անցել է, ի՞նչ գիտենք մեր երեխեքի հետ կապված: Մենք պետք է մեր տներում նստած, բերեն մեզ ասեն՝ սենց ա եղել, ոչ թե ծնողը սուգը թողած գա ընկնի դռնեդուռ: Այս մասին այսօր՝ փետրվարի 20-ին, ՊՆ-ի շենքի դիմաց բողոքի ակցիայի ժամանակ նշեց հունվարի 19-ին Ազատ գյուղի զորամասի կացարանի հրդեհից մահացած զինվորներից մեկի՝ Գոռ Մարտիրոսյանի մայրը:
«Ես Գոռի հետ խոսել եմ ամսի 17-ին, ամսի 18-ին տատիկի հետ է խոսել: Ամեն ինչ նորմալ է եղել, իրենք տղերքով շատ լավ են եղել, ոնց որ մի մոր երեխեք լինեն: Չկարողացան 21 հոգու դեմ գնան, մի վնաս տան, դրա համար նախօրոք սպանել են, նոր վառել: Ո՞վ է դրա պատասխանը տալու: Վառողն ով է եղել, թող բացահայտեն, արդար դատաքննություն անեն: Ո՞վ որոշեց, որ մեր երեխեքը պետք է չապրեն: Մենք չենք հավատում, որ մեր երեխքը հրդեհից են մահացել, դա նախօրոք կազմակերպված սպանություն է եղել, նախօրոեք սպանել են, հետո նոր վառել են: Մեր երեխեքը դուրս էին գալու, թեկուզ գլուխ, ոտք վառվելով դուրս էին գալու: Մենք ոչ մի զոհ չէինք ունենալու: Նրանք պատը կծակեին, դուրս կգային»,-ասաց նա: Մեկ այլ ծնող էլ հավելեց. «15 երեխու արյունն իրենք չեն մարսելու: Մենք չենք հավատում, ի՞նչ բերին, մեզ տվի, մոխրացած մարմիննե՞ր: Ամեն վայրկյան սպասում ես, որ հեսա դուռը կբացվի երեխեդ կգա, հեռախոսը կզանգի: Ես հայ մայրերին կոչ եմ անում չթողեք ձեր երեխեքը գնան ծառայելու, որ մեր վիճակում չհայտնվեն»:
Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։
Դեպքից ժամեր անց վարչապետ Նիկոլ Փաշինյանը կառավարության նիստում ներկայացրեց պաշտոնական վարկածը, ըստ որի սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։
Ավելի ուշ դասակի հրամանատարը լրագրողներին հայտնել էր, որ կացարանում բենզին չի եղել, ըստ էության, հերքելով վարչապետին: Զինդատախազը ևս հայտարարել էր, որ դեռ պարզ չէ՝ բենզին է եղել, թե դիզվառելիք:
Նշենք, որ հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։