Ազատ գյուղի զորամասի կացարանում մահացած զինծառայողների ծնողների կողմից կառավարությունում տեղի ունեցած հանդիպմանը համապարփակ ներկայացվել է համապատասխան պաշտոնյաներին իրենց պահանջներ, վերջիններիս կողմից խոստացվել է ներկայացնել տեղեկատվության հանդիպման հնարավորության մասին: Այս մասին այսօր՝ փետրվարի 20-ին, ՊՆ-ի դիմաց ակցիայի ժամանակ լրագրողների հետ զրույցում հայտնեց 15 զոհված զինծառայողներից 14-ի ծնողների պահերի պաշտպան Նորայր Նորիկյանը:
Նրա խոսքով, ծնողների խիստ անվստահությունը այս վարույթի նկատմամբ առկա է, այդ անվստահությունն ու կասկածանքը ծնվել է հունվարի 19-ից սկսած, երբ կառավարության նիստում իրավասու պաշտոնյաների կողմից:
«Ծնողները շատ հիմնավորված հարցեր են բարձրացնում: Ես ակնկալում եմ, որ այս գործով քննության առարկա դարձվեն հնարավոր բոլոր վարկածները: Օրինակ, սպանության վարկած, դիտավորությամբ կյանքից զրկելու վարկած, թունավորման վարկած, դիվերսիայի վարկած, եւ այլն: Եթե մենք համադրում ենք հրապարակված տեղեկությունները, ստանում ենք բացասական պատկեր: Եթե վերլուծում ենք կապիտանի կողմից հրապարակ բերված ցուցմունքները, ակնհայտ է դառնում, որ հրդեհի բռնկման պահից մինչեւ 15-20 րոպե տեւողությամբ ժամանակահատվածը բավարար էր, որ զինծառայողները դուրս գային տարածքից: Բայց ակնհայտ է, որ զինվորները ոչ մի գործողություն չեն կատարել: Դա հնարավորություն է տալիս արձանագրելու, որն զինվորները պարզապես, կենդանի չեն եղել: Պետք է պատասխանել հետեւյալ հարցին. Հրդեհը հետեւանք է ինչ-որ հետքեր թաքցնելո՞ւ, թե՞ անփույթ գործընթաց է: Առկա տեղեկավությունը մեզ թույլ է տալիս չվստահելու ներկայացված վարկածին, որ երեխաները մահացել են հրդեհի պատճառով: Եթե երկու զինվորի հաջողվել է դուրս գալ տարածքից, ինչո՞ւ մյուս զինվորների համար դա հնարավոր չի եղել: Եթե ծխահարվել են, ապա հարց է առաջանում, ինչու՞ չեն ծխահարվել կենդանի մնացած զինվորները»,-ասաց նա:
Հարցին, թե ո՞վ կարող էր սպանել կամ թունավորել զինվորներին, Նորիկյանը պատասխանեց. «Ոչ մի վարկած հնարավոր չէ բացառել, պետք է տանել խորքային քննություն պարզելու, թե ինչ է կատարվել հրդեհից առաջ: Պետք է հրդեհից առաջ եղած պատկերը վերականգնել»:
Նորիկյանը տեղեկացրեց, որ մինչեւ ծնողների կողմից դեպքի վայր այցելելը բոլոր ծնողներից վերցվել են դեպքի նախորդող եւ հաջորդող ժամանակահատվածի վերաբերյալ գրավոր բացատրություններ, թե իրենք ինչ տեղեկատվության են տիրապետում:
«Այդ դեպքի հետ պայմանավորված այլ հանցագործությունների մասին են հայտնել ծնողները: Մեզ համար շատ կարեւոր է, թե վարույթն իրականացնող մարմինն ինչ վարքագիծ կդրսեւորի այդ հանգամանքների վերաբերյալ, որովհետեւ մեկից ավելի հանցագործությունների մասին ենք հայտնել: Դրանք վերաբերում են զինծառայողների ու սպաների միջեւ եղած տարաձայնություններին, սպաների միջեւ եղած հարաբերություններին, սպաների գործառույթներին, նրանց կողմից իրականացված ոչ օրինական քայլերին: Սպասենք քննությանը:
Մենք ծնողների հետ այցելել ենք դեպքի վայր, ուսումնասիրել ենք տեղանքը, վերարտադրել ենք կացարանի պատկերը եւ մեզ համար պարզել ենք շատ պարզ հանգամանքներ: Անզեն աչքով էլ տեսանելի կլինի, որ տպավորություն է, որ վառվել են մահճակալների եւ դրանց տակ գտնվող հատակը, իսկ մահճակալների միջեւ ընկած 60 սմ-անոց միջանցքները այրված չեն: Տպավորություն է, որ հատուկ այրվել են մահճակալները, որոնց վրա եղել են զինվորները: Հիմա հավաքվում են հիմնական միջնորդությունները, որոնք առաջիկա օրերին երկայացվելու են վարույթ իրականացնող մարմին»,-ասաց փաստաբանը:
Նա նաեւ հավելեց, որ փետրվարի 9-ին պաշտոնապես դիմել են պաշտպանության նախարարինն եւ զինդատախազին՝ նշելով, որ անհրաժեշտ է կազմակերպել նրանց համատեղ հանդիպումը զոհված զինծառայողների ծնողների հետ. «Շատ մանրուքներ կան, շատ բարդ գործ է, բոլոր դետալները վերլուծվում են, դրանց վերաբերյալ կներկայացվեն հավելյալ տեղեկություններ.,-ասաց նա:
Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն:
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը և ևս 7 բարձրաստիճան զինվորականներ։
Դեպքից ժամեր անց վարչապետ Նիկոլ Փաշինյանը կառավարության նիստում ներկայացրեց պաշտոնական վարկածը, ըստ որի սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։
Ավելի ուշ դասակի հրամանատարը լրագրողներին հայտնել էր, որ կացարանում բենզին չի եղել, ըստ էության, հերքելով վարչապետին: Զինդատախազը ևս հայտարարել էր, որ դեռ պարզ չէ՝ բենզին է եղել, թե դիզվառելիք:
Նշենք, որ հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ)։