Բելառուսի նախագահ Ալեքսանդր Լուկաշենկոն բարձր սպայական կազմին պետական մրցանակներ եւ ուսադիրներ շնորհելու ժամանակ հայտարարել է ուկրաինացի ահաբեկչի եւ նրա հանցակիցների կալանավորման մասին, որոնք մասնակցել են Մաչուլիշչի օդանավակայանում А-50 ինքնաթիռի դեմ դիվերսիայի փորձին։ Այս մասին տեղեկացրել է «ԲելՏԱ»-ն։
Լուկաշենկոն նշել է, որ կալանավորվածն ուկրաինական անձնագիր ունեցող ռուսաստանցի է։
«Նա ռուսաստանցի է, ուկրաինական անձնագրով։ Ծնվել է Կրիվոյ Ռոգում, ապրել Ղրիմում։ Հարազատների մի մասն Ավստրիայում է, ոմանք մնացել են Կիեւում։ Նա, կարծես, հավաքագրվել է Ուկրաինայի հատուկ ծառայության կողմից 2014-ին։ Այթիշնիկ է, կամ լավ է հասկանում IT-տեխնոլոգիաները։ Պատրաստվել է ահաբեկչական գործողություններ կատարելու համար»,- ասել է Բելառուսի նախագահը։