Ղրղըզստանն առաջարկում է վեճերի դեպքում ՀԱՊԿ երկրների միջեւ ուժի չկիրառման մեխանիզմ ստեղծել։ Այս մասին կազմակերպության գլխավոր քարտուղար Իմանգալի Տասմագամբետովի հետ հանդիպմանը հայտարարել է Ղրղըզստանի արտգործնախարար Ժեենբեկ Կուլուբաեւը։
«Կուլուբաեւը ուշադրություն է հրավիրել ՀԱՊԿ ներուժի հետագա ամրապնդման եւ զարգացման անհրաժեշտության վրա, հատկապես կազմակերպության պատասխանատվության գոտում ճգնաժամերի կանխման եւ ՀԱՊԿ անդամ պետությունների միջեւ վեճերի լուծման դեպքում իրավական ու քաղաքական առումով պարտավորեցնող ուժի չկիրառման մեխանիզմների մշակման վրա»,-ասվում է կազմակերպության մամուլի հաղորդագրության մեջ։
Նախարարը զրուցակցին ասել է, որ Ղրղըզստանն «աջակցում է արտաքին սպառնալիքների եւ մարտահրավերների նկատմամբ իր անդամ երկրների հավաքական անվտանգության ապահովմանն ուղղված ՀԱՊԿ գործունեությանը»։
Իր հերթին, Տասմագամբետովը վստահեցրել է Ղրղըզստանի արտգործնախարարին, որ ՀԱՊԿ ներուժի զարգացման մասով հնչեցրած դիրքորոշումներն ու հանրապետության առաջարկները հաշվի կառնվեն։