Մայր Աթոռի հետ ջրերը նույն առվով չեն հոսում, որովհետեւ այդ ջրերը նույն առվով չեն կարող հոսել, դրանք տարբեր առուներ են եւ այդ առուները պետք չէ խառնել իրար։ Այս մասին այսօր՝ մարտի 14–ին, ասուլիսի ժամանակ հայտարարեց վարչապետ Նիկոլ Փաշինյանը՝ անդրադառնալով հարցին՝ արդյոք իշխանությունների եւ Մայր Աթոռի միջեւ տարաձայնություններ կան։
«Հայաստանի Հանրապետությունը աշխարհիկ պետություն է եւ սրանով ամեն ինչ ասված է։ Եվ ժողովրդավար պետություն է Հայաստանի Հանրապետությունը, եւ մարդիկ, այդ թվում՝ հոգեւորականները, կարող են իրենց կարծիքներն արտահայտել, եւ ուրիշ մարդիկ կարող են դրանց հետ համաձայն լինել կամ չլինել» ,– ասաց Նիկոլ Փաշինյանը։
Նիկոլ Փաշինյանը հավելեց, որ կարող են բազմաթիվ հարցեր լինել, որոնց շուրջ Մայր Աթոռն ու Հայաստանի իշխանությունները տարբեր դիրքորոշումներ ունեն։ Թե ինչ հարցերի շուրջ են այդ տարաձայնությունները, Փաշինյանը, սակայն, չասաց։
