Կապանի Բաղաբերդ թաղամասի հարակից սարալանջում բռնկված հրդեհը 3 օր անց՝ այսօր՝ մարտի 15–ին, մարվել է։ Հրդեհի հետեւանքով մոտ 22 հա խոտածածկույթ է այրվել, ծառերը վնաս չեն կրել։ Այս մասին NEWS.am-ի հետ զրույցում ասաց ՆԳՆ Փրկարար ծառայության ճգնաժամային կառավարման ազգային կենտրոնի պետ Արսեն Մկրտչյանը։ Նրա խոսքով՝ հրդեհի մարման աշխատանքները երկարել են, որովհետեւ տարածքը դժվարանցանելի է եղել։

«Հրդեհը մարվել է այսօր, ժամը 9։45–ին։ Հրդեհի բռնկման վայրը դժվարամատչելի էր, մեր փրկարարները ոտքով 3,5–4 կիլոմետր բարձրացել են, հնարավոր չէր մեքենայով գնալ, որովհետեւ ժայռոտ տարածք էր, մեքենայի ճանապարհ չի եղել։ Հրշեջ–փրկարարները ուսապարկերի միջոցով են ջրցան գործիքները, բահերը տեղ հասցրել։ Նրանք մոտակա գետերից էին ջուր լիցքավորում։ Բացի այն, որ տարածքը դժվարամատչելի էր, նաեւ հրդեհի մի քանի օջախ կար»,– պատմեց Արսեն Մկրտչյանը։

Հրդեհը մեկուսացվել է երեկ, ժամը 17։45–ին։ Հրդեհի տարածման վտանգ այլեւս չի եղել, բայց ըստ Արսեն Մկրտչյանի՝ ապահովությունից ելնելով հերթապահություն է սահմանվել։

«Այսօր առավոտյան կրկին դեպքի վայր է մեկնել մեր օպերատիվ խումբը, 2–3 փոքր ծխացող տարածքներ են եղել, դրանք էլ մարվել են ու աշխատանքները այդ տարածքում դադարեցվել են»,– հայտնեց Արսեն Մկրտչյանը։

Քննչական կոմիտեից հայտնեցին, որ հրդեհի դեպքի առթիվ պատշաճ հաղորդում չեն ստացել, հետեւաբար քրեական վարույթ չի նախաձեռնվել։

Հիշեցնենք ՝ մարտի 12-ին, ժամը 13։23-ին Սյունիքի մարզային ճգնաժամային կառավարման կենտրոն ահազանգ է ստացվել, որ Կապան քաղաքի Բաղաբերդ թաղամասին հարակից սարալանջում այրվում է խոտածածկույթ: Մթության եւ դժվարանցանելիության պատճառով հրդեհաշիջման աշխատանքները գիշերները դադարեցվում էին։ Հրդեհաշիջման աշխատանքներին մասնակցել են 23 հրշեջ-փրկարար, «Հայանտառ» ՊՈԱԿ-ի «Կապանի անտառտնտեսություն» մասնաճյուղի 15 եւ «Զանգեզուրի պղնձամոլիբդենային կոմբինատ» ՓԲԸ-ի 10 աշխատակից։