Հինգշաբթի օրը ոստիկանությունը, երկրի վարչապետ Էլիզաբեթ Բոռնի՝ խորհրդարանի շրջանցմամբ օրինագիծն անցկացնելու որոշումից հետո ամբողջ Ֆրանսիայում տեղի ունեցած ցույցերի ժամանակ կալանավորել է ավելի քան 300 մարդու։ Այս մասին ուրբաթ տեղեկացրել է հանրապետության ներքին գործերի նախարար Ժերալդ Դարմանենը RTL ռադիոկայանի եթերում։
«Փարիզում կալանավորվել է 258 մարդ, ինչը բավական մեծ թիվ է։ 310 [մարդ է կալանավորվել], եթե հաշվի անենք մարզերը»,- նշել է նա։
Նախարարն ավելացրել է, որ որոշ քաղաքներում, այդ թվում Մարսելում, Նանտում եւ Ռենում, տեղի վարչությունները ենթարկվել են ցուցարարների հարձակմանը։
Մինչ այդ BFM հեռուստաալիքը, հղում կատարելով Ֆրանսիայի ՆԳՆ-ի տվյալներին, տեղեկացրել էր, որ իրավապահ մարմինների աշխատակիցները հինգշաբթի մայրաքաղաքի կենտրոնում կալանավորել են ավելի քան 120 ցուցարարի։
Հինգշաբթի Բոռնը, բանակռիվներից առաջ ելույթ ունենալով Ազգային ժողովում (խորհրդարանի ստորին պալատում), հայտարարել էր կենսաթոշակային համակարգի փոփոխությունների օրինագծի ընդունման մասին՝ խորհրդարանի շրջանցմամբ, կառավարության պատասխանատվությամբ։ Այն, մասնավորապես, նախատեսում է թոշակի տարիքը բարձրացնել 64-ի եւ չեղարկում է մի քանի արտոնյալ կենսաթոշակային ռեժիմներ։ Դա արվել է Ֆրանսիայի Սահմանադրության 49-րդ հոդվածի 3-րդ պարբերությանը համապատասխան, որը կառավարությանը տալիս է նման հնարավորություն, բայց տեքստը համարվում է ընդունված միայն այն դեպքում, եթե 24 ժամվա ընթացքում պատգամավորների ընդհանուր թվի տասներորդ մասը չի ստորագրել պահանջ կառավարությանը վստահության հայտնելու հարցը քվեարկության դնելու մասին։