«ՀԱՊԿ-ն դուրս է գալիս տարածաշրջանից» արտահայտությունը նշանակում է, որ այն գործողությունները, որոնք ՀԱՊԿ-ն պետք է անի, չի անում եւ ցույց է տալիս իր բացակայությունը: Այս մասին խորհրդարանում լրագրողների հետ զրույցում ասաց ԱԺ նախագահ Ալեն Սիմոնյանը:
Հարցին, թե ՀԱՊԿ-ը չի պատրաստվում դուրս գալ տարածաշրջանից, իր գլխավոր քարտուղարին է ուղարկում Հայաստան, Հայաստանը պատրաստվո՞ւմ է որոշակի քայլեր ձեռնարկել ՀԱՊԿ-ից դուրս գալու համար՝ Ալեն Սիմոնյանն ասաց.
«Էդ գալը չի նշանակում, որ ՀԱՊԿ-ը դուրս չի գալու Հայաստանից։ Որ եկել ա, ի՞նչ, ի՞նչ փոխվեց: Հայաստանն, անկախ ամեն ինչից, իր քայլերն անում է, չկա որեւիցե քայլ, որ ՀԱՊԿ-ի անդամ լինելը մեզ այս պահի դրությամբ խոչընդոտում, անհանգստություն է պատճառում: Անկախ նրանից՝ որ կազմակերպության մեջ ենք գտնվում, մենք շարունակում ենք բոլոր հնարավոր ճանապարհները փնտրել ՀՀ անվտանգությունն ապահովելու համար: Իսկ քաղաքական առումով՝ եկավ-գնաց, թող գան-գնան, հարցը դրանով չի լուծվելու, իրենք կգան-կգնան, դա չի խանգարի երկու օր հետո, որ գործողություն անեն, դրա փորձը մենք ունեցել ենք էլ ավելի բարձր պաշտոն ունեցողների դեպքում»:
ԱԺ նախագահը շեշտեց՝ այս պահի դրությամբ ՀԱՊԿ–ի կողմից այն գործողություններն ու արձագանքը, որ կա, միանշանակ Հայաստանին բավարար չէ.
«ՀԱՊԿ–ի գլխավոր քարտուղարի այցելությունը Հայաստան, տեսական մասն ապահովելը, չգիտեմ՝ որքանով է բավարար որեւիցե հողի վրա բան կանգնեցնելու, որովհետեւ լինելով ՀԱՊԿ–ի մեջ, մեկ է ունեցանք Սեւ լիճ, Ջերմուկի ուղղությամբ առաջխաղացումներ»։
