ԱԺ նախագահ Ալեն Սիմոնյանը Արցախի՝ Ադրբեջանին վերաինտեգրվելու հնարավորությունը չի տեսնում։
«Մեծ, շատ մեծ ճանապարհ պետք է անցնի, որ այդպիսի բան հնարավոր լինի։ Անկեղծ ասած՝ ես այսօր ես նման բան հնարավորություն չեմ տեսնում»,– խորհրդարանում լրագրողների հետ զրույցում ասաց Ալեն Սիմոնյանը։
Անդրադառնալով Արցախի խորհրդարանի բոլոր հինգ խմբակցությունների հայտարարությանը, որում նրանք Հայաստանի իշխանություններից պահանջում էին կասկածի տակ չդնել Արցախի ժողովրդի ինքնորոշման իրավունքը, Ալեն Սիմոնյանն ասաց, թե իրենք որեւէ իրավունք կասկածի տակ չեն դնում, այլ խոսում են իրավունքների իրականացման հնարավորության մասին։
«30 տարի մենք գնացել ենք այն ճանապարհով, որը բոլորիս հայտնի է ու տեսել ենք՝ ինչ արդյունք ենք ունեցել։ Հիմա Արցախի իշխանությունները հնարավորություն ունեն իրենք զբաղվել իրենց իրավունքներով։ Կտեսնենք, թե Լեռնային Ղարաբաղի իշխանության արտաքին քաղաքական վեկտորը ինչ փոփոխություններ կապրի, եւ ուր կտանի էդ վեկտորը, իսկ մենք սատար կկանգնենք»,– ասաց նա։
Հայաստանի ԱԺ նախագահն ուրախ է, որ Լեռնային Ղարաբաղի հակամարտության կարգավորման հարցի շուրջ բանակցություններում բարձրացրել է Արցախի դերը։
Դիտարկմանը, թե Արցախի իշխանությունները տեխնիկական հարցեր են քննարկում՝ Ալեն Սիմոնյանն արձագանքեց.
«Ի՞նչ գիտեք։ Հայաստանը որեւէ պահանջ չի ունեցել եւ չունի Ադրբեջանի նկատմամբ։ Հիմա Արցախի եւ Ադրբեջանի իշխանությունները փորձում են խոսակցության ինչ-որ եզրեր գտնել, եւ ես չեմ կարծում, թե պետք է մտնել այդ խոսակցության արանքը եւ փորձեմ մոդերատորի դեր խաղալ»։
Մանրամասները՝ տեսանյութում։