Հայաստանի աշխատանքի եւ սոցիալական հարցերի նախարարությունը 2022 թվականին պետական բյուջեից ստացել է շուրջ 612.6 մլրդ դրամ։ Այս մասին մարտի 20-ին Ազգային ժողովում Աշխատանքի եւ սոցիալական հարցերի մշտական խորհրդարանական հանձնաժողովի նիստում ասել է գերատեսչության ղեկավար Նարեկ Մկրտչյանը՝ ներկայացնելով «2022թվականին Կառավարության ծրագրի (2021-2026թթ.) կատարման ընթացքի եւ արդյունքների մասին» զեկույցը։
Նրա խոսքով, նախորդ տարի նախարարությանը հաջողվել է իրականացնել 16 ծրագիր՝ 126 միջոցառումներով։ Կատարումը կազմել է 98,7 տոկոս:
«Պետբյուջեից կենսաթոշակների վճարումն ապահովելու համար հատկացվել է մոտ 412 մլրդ դրամ, իսկ ժողովրդագրական իրավիճակը բարելավելու համար՝ 40 մլրդ դրամ»,- ասել է Մկրտչյանը։
Միաժամանակ պետությունը 27,6 մլրդ դրամ է հատկացրել բնակչության սոցիալապես անապահով խմբերին աջակցելու համար, իսկ բնակչության սոցիալական պաշտպանությունն ապահովելու համար՝ 73,9 մլրդ դրամ։