Ուկրաինայի եվրաինտեգրման հարցում Բուդապեշտի դիրքորոշումն ուղղակիորեն կախված կլինի նրանից, թե կվերադարձնի արդյոք Կիեւը հունգարական փոքրամասնությանը մինչեւ 2015 թվականը գոյություն ունեցած իրավունքները։ «ՌԻԱ Նովոստի»-ի փոխանցմամբ՝ այս մասին հայտարարել է Հունգարիայի արտաքին գործերի եւ արտաքին տնտեսական կապերի նախարար Պետեր Սիյարտոն։
«Ես հասկացրեցի, որ ուկրաինական եվրաինտեգրման գործընթացի վերաբերյալ հունգարական դիրքորոշումը հիմնականում կորոշվի նրանով, թե հարգում է արդյոք Ուկրաինան հունգարական ազգային համայնքի իրավունքները եւ արդյոք նա հունգարական ազգային համայնքին կվերադարձնի այն իրավունքները, որոնք ուներ մինչեւ 2015 թվականը»,- ասել է Սիյարտոն Facebook-ում ելույթի հեռարձակման ժամանակ։
Նա նաեւ հայտնել է, որ ԵՄ ԱԳ նախարարների հանդիպմանը կոչ է արել իր գործընկերներին եւ եվրոպական դիվանագիտության ղեկավար Ժոզեպ Բորելին ազդել Ուկրաինայի իշխանությունների վրա այս հարցում։
Հունգարիայի ԱԳՆ ղեկավարն ավելի վաղ ասել էր, որ Հունգարիայի եւ Ռումինիայի նախաձեռնությամբ ԵԽ-ն որոշել է դիմել Վենետիկի հանձնաժողովին՝ Ուկրաինայում ազգային փոքրամասնությունների վիճակի հարցով։ Բուդապեշտը հուսով է, որ Կիեւին կհարկադրեն կատարել նրա որոշումը։