Չինաստանի արտաքին գործերի նախարարությունը հայտարարել է, որ ԱՄՆ նախագահ Ջո Բայդենի կողմից ստորագրված օրենքը, որը պարտավորեցնում է հետախուզությանը բացահայտել COVID-19-ի ծագման վերաբերյալ տվյալները, քաղաքական մանիպուլյացիա է։ Այս մասին հայտնում է Reuters-ը։
Ինչպես հերթական ճեպազրույցում ասել է ՉԺՀ ԱԳՆ պաշտոնական ներկայացուցիչ Վան Վենբինը, Չինաստանի հետ կապված օրինագծի բովանդակությունը խեղաթյուրում է փաստերը։
ԱՄՆ նախագահ Ջո Բայդենը երկուշաբթի ստորագրել է Կոնգրեսի կողմից ավելի վաղ հաստատված օրինագիծը, ըստ որի՝ ԱՄՆ հետախուզությունը պետք է գաղտնազերծի COVID-19-ի ծագման վերաբերյալ իր տվյալները։
Բայդենը նշել է, որ ԱՄՆ կառավարությունը «կշարունակի ուսումնասիրել COVID-19-ի ծագման վերաբերյալ բոլոր գաղտնի տեղեկությունները, ներառյալ Ուհանի վիրուսաբանության ինստիտուտի հետ հնարավոր կապերը»:
