Ես շատ հանգիստ եմ նայում մեր արցախցի քույրերի եւ եղբայրների աչքերին, պարբերաբար հանդիպում եմ արցախցի գործընկերների հետ, քննարկումներ ենք ունենում ու ներկայացնում ենք այն ամենը՝ ինչ Հայաստանի իշխանությունները իրականացնում են։ Այս մասին այսօր՝ մարտի 21–ին, խորհրդարանում լրագրողների հետ զրույցում ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով հարցին, թե կարողանալո՞ւ են արցախցիների աչքերին նայել՝ հաշվի առնելով, որ Արցախը 100 օր է շրջափակման մեջ է գտնվում եւ ի՞նչ են անում, որ Արցախը շրջափակումից դուրս գա։
«Լաչինի միջանցքի փակման պահից սկսած մենք օգտագործում ենք դիվանագիտական բոլոր գործիքները, որ կարողանանք հասնել, որ Ադրբեջանը վերջ տա ապօրինի շրջափակմանը, բացի ճանապարհը։ Մենք ենք, որ հարցը մտցրել ենք ՄԱԿ–ի Անվտանգության խորհուրդ, մեր դիմումի համաձայն է, որ Արդարադատության միջազգային դատարանը կայացրել է այդ որոշումը, սրանք քայլեր են, որոնք կաթիլ առ կաթիլ պետք է ձեւավորեն ընդհանուր ճնշման կրիտիկական զանգվածը, որից հետո միջազգային հանրության հետ միասին պետք է Ադրբեջանին ստիպենք, որ բացի միջանցքը։ Մենք մեր բոլոր ռեսուրսները մոբիլիզացրել ենք, որ օր առաջ կարողանանք բացել միջանցքը, բայց մենք նաեւ տեսնում ենք, որ Ադրբեջանը չի պահում ստանձնած որեւէ պարտավորություն, եւ աստեղ մենք անելիք ունենք, որ ստիպենք Ադրբեջանին կատարել իր վրա դրված պարտավորությունները։ Սա դժվար ճանապարհ է, խաղաղության ճանապարհը հեշտ չէ, բայց գուցե հակառակորդի հաշվարկը հենց այն է, որ մեզ սադրի եւ մենք հրաժարվենք դիվանագիտական գործիքակազմից, սկսենք անկանոն շարժումներ անել, որոնք նրանց հիմք կտան լեգիտիմացնելու ապագա հնարավոր էսկալացիան»,– նշեց Հայկ Կոնջորյանը։
