Վրաստանի իշխող կուսակցության գլխավոր քարտուղար, Թբիլիսիի քաղաքապետ Կախա Կալաձեն Գերմանիայի Վրաստան ԱԳ նախարարի պաշտոնական այցի մեկնարկից մի քանի ժամ առաջ հայտարարել է, որ Աննալենա Բերբոքը «իրականությունից կտրված է»- հայտնում է «Новости-Грузия»-ն։
Այսպես է նա մեկնաբանել այցի նախօրեին Բերբոքի հայտարարությունն այն մասին, թե ինքը փորձեր է տեսնում «տապալելու երկրի եվրոպամետ կուրսը, որին հավատարիմ է վրացիների ճնշող մեծամասնությունը»։
«Ես չգիտեմ, թե ինչի մասին է նա խոսում: Հասկանալի է, որ այդ մարդը իրականությունից կտրված է: Սա այն կուրսի եւ այն գծի շարունակությունն է, որը մենք վերջին օրերին լսում ենք Վրաստանի վերաբերյալ, սա բացարձակ սուտ է։ Վրաստանն ամեն ինչ անում է եվրաինտեգրման ճանապարհին»,- ասել է Կալաձեն։
Միաժամանակ Կալաձեն պնդում է, որ ԵՄ-ի թեկնածուի կարգավիճակ ստանալու 12 կետից բաղկացած ծրագրի իրականացմանը խոչընդոտում են ոչ թե իշխանությունները, այլ ընդդիմությունը։
Նույն կարծիքն է հնչեցրել «Վրացական երազանքի» նախագահ Իրակլի Կոբախիձեն։
«Մեր նպատակը դեկտեմբերին թեկնածու դառնալն է, եւ մեր օրակարգում 12 խորհուրդների իրականացումն է։ Ինչ վերաբերում է այս ճանապարհին առկա խոչընդոտներին, ապա խոչընդոտները ստեղծվում են միակ կողմից, դա արմատական ընդդիմությունն է, որն ընդհանրապես ներառված չէ համապատասխան բարեփոխումների իրականացման մեջ»,- ասել է Կոբախիձեն։
Վրաստան այցը սկսելուց առաջ Գերմանիայի արտաքին գործերի նախարար Աննալենա Բերբոքը աջակցություն է հայտնել երկրի եվրոպական հեռանկարներին՝ նշելով, որ այսօր այս գործընթացը բախվել է ներքին եւ արտաքին ուժերի հակազդեցությանը։
Բերբոքը երկօրյա այցով Վրաստան կժամանի մարտի 23-ին։ Նախատեսվում են բանակցություններ վարչապետի, նախագահի, արտաքին գործերի նախարարի, քաղաքացիական հասարակության ներկայացուցիչների հետ, հայտնել են Վրաստանի ԱԳՆ-ից։ Ծրագիրը ներառում է նաեւ այցելություն Ցխինվալի տարածաշրջանի օկուպացիոն գիծ եւ հանդիպում ԵՄ դիտորդական առաքելության (EUMM) ներկայացուցիչների հետ։
«Վրաստան իմ այցի ընթացքում ես կցանկանայի հստակեցնել, որ Գերմանիան լիովին աջակցում է Վրաստանի եվրոպական հեռանկարին»,- գրել է նախարարը Թբիլիսի ժամանելուց առաջ։
«Մենք փորձեր ենք տեսնում տապալելու երկրի եվրոպամետ կուրսը, որին հետեւում է վրացիների ճնշող մեծամասնությունը։ Մենք տեսնում ենք այն ճնշումը, որին ենթարկվում է երկիրը ներսից եւ դրսից»,- հավելել է Բերբոքը: