Ամբողջ Ֆրանսիայում կենսաթոշակային բարեփոխումների դեմ ցույցերի ժամանակ ձերբակալվածների թիվը հասել է 457-ի: Նման տվյալներ է ներկայացրել Ֆրանսիայի ներքին գործերի նախարար Ժերալդ Դարմանենը CNEWS հեռուստաալիքի եթերում։
«457 ձերբակալված ամբողջ Ֆրանսիայում։ Վիրավոր ոստիկանների թիվը 441 է»,-ասել է նա։
Նախարարը շնորհակալություն է հայտնել իրավապահ մարմինների աշխատակիցներին եւ հրշեջներին բողոքի ակցիաներին իրենց կատարած աշխատանքի համար:
Կենսաթոշակային բարեփոխման դեմ համընդհանուր բողոքի իններորդ օրն անցկացվել է Ֆրանսիայի քաղաքներում։ Մայրաքաղաքում ցույցը, որը սկսվել է խաղաղ ճանապարհով, արագորեն վերածվել է ոստիկանության հետ ագրեսիվ տրամադրված երիտասարդների բախումների։ Ոստիկանության վրա շշեր, քարեր եւ ճայթրուկներ նետած խուլիգաններին ցրելու համար իրավապահները ստիպված են եղել բազմիցս արցունքաբեր գազ կիրառել։ Ընդհանուր առմամբ, ոստիկանության հաշվարկներով, ցուցարարների թվում եղել են 1,5 հազար խուլիգաններ, որոնցից շատերը հատուկ այդ օրը ժամանել են Փարիզի արվարձաններից: