Իսրայելի պաշտպանության նախարար Յոավ Գալանտը պաշտոնանկ է արվել վարչապետ Բենիամին Նեթանյահուի կողմից՝ դատաիրավական բարեփոխումների ծրագրերից հրաժարվելու նրա կոչից հետո, հաղորդում է BBC-ն։
Հաղորդվում է, որ Նեթանյահուն հրավիրել է Գալանտին հանդիպման եւ ասել, որ այլեւս չի հավատում իրեն որպես պաշտպանության նախարարի:
Գալանտը մտահոգություն է հայտնել իսրայելական բանակում տեղի ունեցող անկարգությունների կապակցությամբ, որոնք, ըստ նրա, վտանգ են ներկայացնում երկրի անվտանգության համար: Վկայակոչելով ընդդիմության հետ երկխոսության անհրաժեշտությունը՝ Գալանտը Նեթանյահուի կոալիցիային խնդրել է սպասել մինչեւ հաջորդ ամիս արձակուրդից խորհրդարանի վերադարձը՝ նախքան Գերագույն դատարանը թուլացնելու իր պառակտիչ ծրագիրը առաջ տանելը:
«Հանուն Իսրայելի անվտանգության, հանուն մեր որդիների ու դուստրերի, օրենսդրական գործընթացը պետք է առայժմ կասեցվի», - ասել է Գալանտը։
«Իսրայելի հասարակության մեջ տեղի ունեցող իրադարձությունները չեն խնայում Իսրայելի պաշտպանության ուժերը. բոլոր կողմերից բարկության, ցավի եւ հիասթափության զգացումներ են առաջանում այնպիսի ինտենսիվությամբ, որը ես նախկինում չեմ զգացել», - նշել է նա՝ ընդգծելով․ «Ես տեսնում եմ, որ մեր ուժի աղբյուրը քայքայվում է»:
Դատական համակարգի նկատմամբ վերահսկողությունը մեծացնելու կառավարության ծրագիրը առաջացրել է Իսրայելի պատմության մեջ ամենամեծ բողոքի շարժումը եւ մեծ ազգային ճգնաժամ, ներառյալ քաղաքացիական պատերազմի մասին նախագահի նախազգուշացումները: