Փարիզի Առեւտրի միջազգային պալատի արբիտրաժային դատարանը հօգուտ Իրաքի որոշում է կայացրել Թուրքիայի դեմ հայցով, որով վիճարկվում էր Քրդստանից այդ երկրի տարածքով նավթի արտահանումը:
Ինչպես հաղորդում է Իրաքի նավթի նախարարությունը, վերջնական դատական որոշումը կայացվել է մարտի 23-ին։
Իրաքը մեղադրել է Թուրքիային 1973 թվականի համաձայնագրի դրույթները խախտելու մեջ, ըստ որի թուրքական կառավարությունը պետք է կատարի իրաքյան կողմի հրահանգները Իրաքից արտահանվող նավթը բոլոր պահեստային, փոխադրման կենտրոններ եւ վերջնական սպառողներ տեղափոխելու վերաբերյալ։
Իրաքի նավթի նախարարությունը հիշեցնում է, որ իրաքյան հումքի իրացումն իրականացվում է SOMO միակ մարքեթինգային ընկերության միջոցով, որը թուրքական Ջեյհան նավահանգստի միջոցով արտահանման գործառնությունները կառավարելու իրավասություն ունեցող կազմակերպություն է: Պրոֆիլային գերատեսչությունը դատական որոշումից հետո մտադիր է Ջեյհանով նավթի արտահանման մեխանիզմները քննարկել Քրդստանի համապատասխան իշխանությունների եւ թուրքական կողմի հետ՝ հումքի կայուն մատակարարումներն ապահովելու եւ միջազգային ընկերությունների հանդեպ SOMO-ի պարտավորությունների կատարման համար:
Իրաքի հյուսիսից նավթի արտահանումը դադարեցվել է մարտի 25-ին այն բանից հետո, երբ միջազգային արբիտրաժային դատարանը վճռել է, որ Թուրքիան խախտել է երկկողմ համաձայնագիրը՝ աջակցելով Քրդստանի տարածաշրջանային կառավարության անկախ խողովակաշարային հոսքերին, հաղորդում է Iraq Oil Report-ը:
Իրաքյան Քրդստանով անցնում է Քիրքուք-Ջեյհան նավթամուղը։ 2017 թվականին Քրդստանում տեղի է ունեցել տարածաշրջանի անկախության հանրաքվե, որտեղ հարցվածների ճնշող մեծամասնությունը կողմ է արտահայտվել անկախությանը: Չնայած այն հանգամանքին, որ Բաղդադը թույլ չի տվել Էրբիլին առանձնանալ, ինքնավար մարզն ինքնուրույն նավթ է արտահանել եւ ստացել դրա դիմաց ստացված միջոցները՝ առանց դաշնային կառավարության հետ համակարգելու:
Իրաքից արտահանման ծավալները փետրվարին կազմել են օրական 3,295 մլն բարել կամ 8,9 տոկոսով պակաս, քան հունվարին։ Մասնավորապես, Կենտրոնական եւ Հարավային Իրաքի նավթահանքերից անցյալ ամիս փոխադրվել է 89,14 մլն բարել, երկրի հյուսիսից՝ Քիրքուքի հանքավայրից, Ջեյհան նավահանգստով՝ 3,834 մլն բարել: