Համաշխարհային տնտեսության երկարաժամկետ աճի տեմպերը մինչեւ 2030 թվականը կնվազեն մինչեւ վերջին 30 տարվա ամենացածր մակարդակը, եւ նրան կարող է սպասել «կորցրած տասնամյակ»: Նման նախազգուշացումներ կան Համաշխարհային բանկի (ՀԲ) երկուշաբթի օրը հրապարակված զեկույցում։

Ինչպես ընդգծում են դրա հեղինակները, «վերջին երեք տասնամյակների ընթացքում առաջընթաց ու բարգավաճում ապահոված գրեթե բոլոր տնտեսական ուժերը շնչում են»։ «Արդյունքում ակնկալվում է, որ 2022-2030 թվականների ընթացքում համաշխարհային ՀՆԱ-ի միջին պոտենցիալ աճը այս դարի առաջին տասնամյակում տիրող տեմպերից կնվազի մոտ մեկ երրորդով՝ մինչեւ տարեկան 2,2%: Զարգացող տնտեսությունների համար այդ անկումը նույնքան կտրուկ կլինի՝ 2000-2010 թվականներին տարեկան 6%-ից մինչեւ 4% այս տասնամյակի մնացած հատվածում: Այս անկումը շատ ավելի լուրջ կլիներ համաշխարհային ֆինանսական ճգնաժամի կամ ռեցեսիայի դեպքում»,- գրում են ՀԲ մասնագետները։

Համաշխարհային բանկի գլխավոր տնտեսագետ Ինդերմիթ Գիլն ընդգծել է, որ «համաշխարհային տնտեսությանը, հնարավոր է, նոր կորսված տասնամյակ է սպասում»:

Միեւնույն ժամանակ, Համաշխարհային բանկը կարծում է, որ համաշխարհային ՀՆԱ-ի աճի տեմպերը կարող են աճել 0,7 տոկոսային կետով՝ մինչեւ միջին տարեկան 2,9% մակարդակ։ Դա անելու համար երկրները պետք է մշակեն «կայուն աճին ուղղված քաղաքականություն», նշում է Համաշխարհային բանկը։