Մոսկվան առաջընթաց է արձանագրում Իրանի եւ ԵԱՏՄ-ի միջեւ ազատ առեւտրի մասին լիարժեք համաձայնագրի կնքման շուրջ բանակցություններում եւ ակնկալում է արագ արդյունքի հասնել, հայտարարել է ՌԴ ԱԳՆ-ն Ռուսաստանի եւ Իրանի ԱԳ նախարարների բանակցություններից առաջ։
«Մենք առաջընթաց ենք արձանագրում Իրանի եւ ԵԱՏՄ-ի միջեւ ազատ առեւտրի համաձայնագրի կնքման շուրջ բանակցություններում։ Արդեն տեղի է ունեցել խորհրդակցությունների վեց փուլ։ Ակնկալում ենք հնարավորինս շուտ հասնել ցանկալի արդյունքի։ Սա լրացուցիչ խթան կհաղորդի երկկողմ առեւտրատնտեսական համագործակցությանը, որի ծավալները շարունակում են աճել»,- ասված է գործակալության կայքում հրապարակված հաղորդագրության մեջ։
Նշվում է, որ տարբեր մակարդակներում, այդ թվում՝ ամենաբարձր, քաղաքական երկխոսության բարձր դինամիկան պահպանվում է։ Շփումներ են իրականացվում արտաքին գործերի նախարարությունների, կառավարությունների, խորհրդարանների, Անվտանգության խորհուրդների քարտուղարների եւ այլ կառույցների ու կազմակերպությունների միջոցով։
Հիշեցնենք, որ մարտի 29-ին Իրանի արտգործնախարար Հոսեյն Ամիր Աբդոլլահիանը կայցելի Մոսկվա, որտեղ բանակցություններ կանցկացնի իր ռուս գործընկեր Սերգեյ Լավրովի հետ։
