Բաքվում ինտենսիվորեն փնտրում են պատգամավոր Ֆազիլ Մուստաֆայի դեմ մահափորձի «արտաքին ազդեցությունն» ու «իրանական հետքը»։
Հիշեցնենք, որ նրա վրա կրակել են իր տան մոտ, պատգամավորը վնասվածք է ստացել ուսի եւ ոտքի հատվածում։ Մուստաֆան հոսպիտալացվել է, կյանքին վտանգ չի սպառնում։ Փաստի առթիվ հարուցվել է քրեական գործ 277-րդ հոդվածով (պետական կամ հասարակական գործչի նկատմամբ մահափորձ՝ նրա պաշտոնական կամ քաղաքական գործունեությունը դադարեցնելու նպատակով) եւ 228.2.1-րդ հոդվածով (նախնական համաձայնությամբ զենքի ապօրինի շրջանառություն)։ Մահափարձն «ահաբեկչություն» են որակել։
Ահաբեկչությունը համընկել է Ադրբեջանի պետական անվտանգության ծառայության օրվա տոնակատարության, երկրի արտգործնախարարի՝ Իսրայել այցի եւ այնտեղ ադրբեջանական դեսպանատան բացման հետ: «Բոլորը գիտեն, որ Հայաստանի հետ մեկտեղ կա եւս մեկ պետություն, որն ունակ է Ադրբեջանի դեմ սադրանքների եւ բացահայտ հայտարարում է այդ մասին․ դա Իրանն է»,-ասել է «Ենի Ադրբեջան» կուսակցության պատգամավոր Մաշհուր Մամեդովը։
Հատուկ ծառայությունների նախկին աշխատակից Արաստուն Օրուջլուն հայտարարել է, որ այս միջադեպը սպասելի էր եւ թիրախը միայն Մուստաֆան չէր: Նրա խոսքով՝ քաղաքական գործիչների վրա հարձակումները միշտ ուղղված են հասարակության մեջ շփոթություն եւ վախ սերմանելուն:
Դեռեւս պարզ չէ, թե ով է կանգնած ահաբեկչության հետեւում, բայց եթե հարձակման նպատակը քաղաքական գործիչն է կամ խորհրդարանի անդամը, ապա դա ազդանշան է առ այն, որ ոչ ոք չի կարող իրեն ապահով զգալ, եւ դա բաց մեսիջ է, կարծում է Օրուջլուն:
Իր հերթին, Ժողովրդական ճակատ կուսակցության առաջնորդ Ալի Քերիմլին քննադատել է իշխանություններին իրական հանցագործության դեմ պայքարելու անկարողության համար: «Իշխող ռեժիմը մասնագիտանում է ընդդիմությանը ճնշելու մեջ եւ ի վիճակի չէ պայքարելու իրական հանցագործության դեմ։ Հուսով եմ, որ կառավարությունը շահագրգռված է այս հանցագործության բացահայտմամբ։ Կառավարությունը պետք է վերջապես կատարի իր աշխատանքը, եւ պետական ռեսուրսները պետք է հատկացվեն իրական հանցավորության դեմ պայքարին, այլ ոչ թե անկախ մարդկանց եւ ընդդիմադիրների հետապնդմանը»,-ասել է նա։