Զինվորը հենց նրա համար է, որ մի փոքր շարժումից անգամ կարողանա վեր կենալ ու վազել: Այս մասին այսօր՝ մարտի 30-ին, NEWS.am-ի հետ զրույցում նշեց Ազատ գյուղում զինվորական կացարանի հրդեհից մահացած զինծառայողներից Հրաչյա Գրիգորյանի տատը՝ Պայծառ Գալստյանը:
«Եթե կրակ է եղել, ձայներ են եղել, ոնց կարող է զինվորը էդտեղ պառկած մնալ: Բոլորս էլ կարծում ենք, որ նախապես տղաներն արդեն մահացած են եղել, եւ հրդեհը կարծես, այդ ամենը փակելու համար է: Պատկերացրեք ձեր ձեռքը մտցրել եք եռման ջրի մեջ: Կսպասեք մինչեւ վառվի՞, թե՞ կվազեք:
Այս ընթացնք այնքան հանգիստ է գնում, կարծես ոչ մի բան չի եղել, այդպես էլ պետք է լիներ: Դուք պատկերացնո՞ւմ եք, թե դա ծնողի համար ինչ է: Ծնողներն այդ ցավը, այդ վիշտը կրծելով դիմանում են, սպասում են, տեսնեն՝ վերջնական ինչ է լինում, որից հետո կտեսնեն, թե ինչ անեն»,-ասաց նա:
Անդրադառնալով նրան, որ հրդեհից ժամեր անց կառավարության նիստում վարչապետը միանգամից վարկած առաջ քաշեց, մահացած զինծառայողի տատն ասաց. «Այդ հայտարարությունը պետք է չլիներ: Ինքը պետք է պատասխանի, թե ոնց կարող էր այդքան շուտ իմանալ, թե ինչ է տեղի ունեցել, ով է իրեն հայտնել, որ մի սուրճի բաժակով բենզին է լցրել, շուռ տվեց, այրեց ու 15 տղաներ այրվեցին»:
Նա հավելեց, որ զինծառայողներն իրար հետ շատ լավ հարաբերություններ են ունեցել. «Անգամ, երբ մենք սնունդ էինք ուղարկում, դնում էինք բոլորի համար, որովհետեւ իրենց մոտ ամեն ինչը միասնական էր: Էդ կացարանն էլ ծնողների միջոցով էր սարքվել, ջուր էին քաշել, պաստառապատել էին»,-ասաց նա:
Հիշեցնենք, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երեւան՝ Այրվածքաբանության ազգային կենտրոն:
Դեպքից անմիջապես հետո առաջին նախնական վարկածն առաջ է քաշել Փաշինյանը, հայտարարելով, թե սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։
Դեպքի առնչությամբ նախաձեռնվել է քրեական վարույթ՝ մի քանի հոդվածով: Գործով մեղադրյալի կարգավիճակ ունի հինգ սպա, որոնցից երեքը կալանքի տակ են: