Ստրասբուրգում հոկտեմբերի 3-ից 9-ը կկայանա ԵԽԽՎ աշնանային նստաշրջանը, որը Հայաստանի համար հատկանշական է Հայաստանի պարտավորությունների կատարման եւ Հայաստանում ժողովրդավարական ինստիտուտների գործունեության վերաբերյալ զեկույցի քննարկմամբ: Այդ մասին NEWS.am-ի թղթակցի հետ զրույցում հայտնեց ԵԽԽՎ-ում հայկական պատվիրակության անդամ Նաիրա Զոհրաբյանը:
Զոհրաբյանը հիշեցրեց, որ նախագծի համազեկուցողներ Ալեքս Ֆիշերն եւ Ջոն Պրեսկոտը Փարիզում կայացած մոնիտորինգի նիստում արդեն իսկ զեկույցը ներկայացրել են ընդհանուր գծերով: «ԵԽԽՎ-ի համազեկուցողների վերջին հայատարարության համաձայն` նրանք դրական են գնահատում հայաստանյան քաղաքական վերջին զարգացումները քաղաքական մթնոլորտի կայունացումը եւ, բնականաբար դրական են գնահատում քաղաքական իշխանության կողմից կատարված վերջին քայլերը»:
Միաժամանակ Զոհրաբյանը չբացառեց, որ ադրբեջանական պատվիրակության անդամները կփորձեն ինչ-որ ուղղումներ առաջարկել զեկույցում, բայց վստահություն հայտնեց, որ զեկույցը կընդունվի այն տեսքով, ինչ տեսքով որ ներկայացրել են համազեկուցողները:
Բացի այդ, նա նաեւ տեղեկացրեց, որ պատվիրակության մի քանի անդամներ, այդ թվում նաեւ ինքը, հերթագրվել են Հայաստանի մասին զեկուցի վերաբերյալ ելույթ ունենալու եւ իրենց դիրքորոշումներն արհատայտելու համար: Զոհրաբյանը նաեւ կարեւորեց Մարինա Շուստերի ներկայացվելիք զեկույցը Ազգային սուվերենիտետների վերաբերյալ: «Շուստերի զեկույցում տեղ են գտել մի շարք վիճելի դրույթներ, որոնց կոնտեքստում խոսելու եմ այնպիսի կարեւոր սկզբունքի մասին, ինչպիսին ազգերի ինքնորոշման իրավունքն է, որը ՄԱԿ-ի կանոնադրության մեջ ամրագրված է որպես գերակա սկզբունք եւ, հասկանալի է, խոսելու եմ Լեռնային Ղարաբաղի օրինակով»,- ասաց Զոհրաբյանը: