Իմ լիակատար աջակցությունն եմ հայտնում բոլոր դատավորներին, մեր կառավարման ժամանակ դատարանը դարձավ անկախ եւ ազատ որեւէ միջամտությունից։ Գերագույն դատարանում Արդարադատության բարձրագույն խորհրդի անդամների հետ հանդիպումից հետո այս մասին հայտարարել է Վրաստանի վարչապետ Իրակլի Ղարիբաշվիլին, հայտնում է Վրաստանի Առաջին ալիքը։
Նրա խոսքով՝ ցանկացած միջամտությունը կամ դատավորների վրա ազդեցությունն անընդունելի է։
«Ուզում եմ հանրությանն ասել, որ հանդիպում եմ ունեցել Նինո Կադագիձեի, դատավորների, Արդարադատության բարձրագույն խորհրդի անդամների հետ։ Իմ հիմնական ուղերձը եղել է եւ կա հետեւյալը։ Որպես կառավարության ղեկավար եւ իշխող կուսակցության ներկայացուցիչ՝ ես լիովին աջակցում եմ բոլոր դատավորներին, մեր կառավարման ժամանակ դատարանը դարձավ անկախ, ազատ՝ որեւէ միջամտությունից՝ ինչպես ներքին, այնպես էլ արտաքին։
Իհարկե, դատավորների վրա ցանկացած միջամտություն կամ ազդեցություն անընդունելի է։ Սա բացարձակապես անընդունելի է բոլորիս համար, հատկապես ինքնիշխան դատարանի եւ ինքնիշխան երկրի դատավորների համար։ Ես վստահեցրել եմ նաեւ հարգարժան դատավորներին, որ մենք լիովին աջակցում ենք նրանց։ Մենք ամեն ինչ անելու ենք, որպեսզի պաշտպանենք դատարանի անկախությունը, դատարանի ազատությունը ցանկացած միջամտությունից, ճնշումից։ Սա մեր հռչակած քաղաքականությունն է եւ գլխավոր նպատակը, որին մենք ձգտում ենք մեր թիմի իշխանության գալուց հետո»,- ասել է Իրակլի Ղարիբաշվիլին։
