Այսօր ոստիկանությունը մտնում է մի կլուբ, որտեղ բոլորին հայտնի է, որ թմրամիջոցներ են տարածվում՝ սինթետիկ թմրամիջոցներից սկսած մինչեւ ամեն ինչ, միջոցառում է իրականացվում, մեկ էլ տեսեք, ասում են՝ բռնություն. Ի՞նչ բռնություն: Այս մասին, այսօր՝ ապրիլի 25-ին, Աժ-ում հայտարարեց ԱԺ պաշտպանության և անվտանգության հարցերի հանձնաժողովի փոխնախագահ, ՔՊ-ական պատգամավոր Արմեն Խաչատրյանը:
«Մենք բոլորս պետք է լծվենք թմրամիջոցների դեմ պայքարի գործին՝ պատգամավոր, ոստիկան, դատախազ, դատավոր: Մեր առաջին խնդիրը պետք է լինի պայքարը թմրամիջոցների դեմ:
Այս վիճակագրությամբ եւ այս միջոցներով, որ պայքար է տարվում, մենք հեռու չենք գնալու, մենք ուղղակի պատկերացում չունենք»,-ասաց ՔՊ-ական պատգամավորը:
Նա առաջարկեց բոլոր պետական մարմիններում, որտեղ կնքվում է աշխատանքային պայմանագիր, անպայման ավելացվի տող, որ աշխատողը տարվա մեջ 1-2 անգամ անցնի թմրաթեստ, և թեստից հրաժարվելն աշխատանքից ազատման հիմք լինի՝ սկսած ԱԺ-ից, վերջացրած բոլոր հիմնարկները եւ ՏԻՄ մարմինները:
Նշենք, որ ապրիլի 23-ին ոստիկանության աշխատակիցները թմրամիջոցների շրջանառության դեմ պայքարի շրջանակներում մտել են «Պոլիգրաֆ» ակումբ եւ, ըստ գործողություն իրականացրել: Համացանցում հայտնվել են տեսանյութեր եւ լուսանկարներ, որտեղ երեւում է, որ իրավապահները բռնություն են գործադրել:
Այս առնչությամբ «Պոլիգրաֆ» ակումբը հանդես է եկել հայտարարությամբ՝ մասնավորապես, նշելով. «Գիշերը ժամը 1-ի մոտակայքում, ՀՀ ոստիկանությունը առանց որևէ իրավական հիմք ներկայացնելու ներխուժել է Պոլիգրաֆ: Ակումբում բոլորին պառկացրել են հատակին և բռնի ուժով տարել ոստիկանական բաժանմունք։ Մեր աշխատակազմն ու այցելուները ենթարկվել են դաժան ծեծի և խուզարկվելու համար մերկացվել ոստիկանության բաժնում։
Մենք արդարություն ենք պահանջում բոլոր տուժածների համար։
Պահանջում ենք, որ Poligraf-ի ապօրինաբար պլոմբված դռները բացվեն»: