Սլովակիայի «Դուհա» ընկերությունը հետաքրքրված է Հայաստանում իրականացվող մի շարք ծրագրերով:
Հայաստանի փոխվարչապետ, տարածքային կառավարման նախարար Արմեն Գեւորգյանն այսօր` սեպտեմբերի 27-ին, ընդունել է Սլովակիայի «Դուհա» («Duha») ընկերության պատվիրակությանը` գլխավոր տնօրեն Միրոսլավ Ռեմետայի գլխավորությամբ: Ընկերությունը ոչ միայն Սլովակիայում, այլեւ եվրոպական տարբեր երկրներում գործունեություն է ծավալում հիմնականում ենթակառուցվածքների զարգացման ոլորտում:
ՏԿՆ մամուլի ծառայությունից NEWS.am-ին հայտնում են, որ հյուրերը տեղեկացրել են, որ հետաքրքրված են Հայաստանում իրականացվող մի շարք` «Հյուսիս-հարավ» ճանապարհային միջանցքի, «Իրան- Հայաստան» երկաթուղու կառուցման, ինչպես նաեւ Երեւան քաղաքի աղբահանության եւ սանմաքրման ծրագրերով: Ընկերությունն ուսումնասիրում է նաեւ հանքաքիմիական ոլորտում համագործակցության եւ փոխշահավետ ծրագրերի իրականացման հնարավորությունները:
Փոխվարչապետն ողջունել է ընկերության մտադրությունները` նկատելով, որ ենթակառուցվածքների զարգացման խնդիրներն առաջիկա տարիներին գտնվելու են ՀՀ կառավարության ուշադրության կենտրոնում: Վերջին տարիներին կարեւորվում են նաեւ աղբահանության, աղբի վերամշակման հետ կապված հարցերը: Բացի Երեւան քաղաքում աղբահանության ծրագրից, գերմանական KfW բանկի աջակցությամբ նման ծրագրեր են մշակվում մյուս խոշոր քաղաքների համար, եւ ՀՀ կառավարությունը նույնպես հետաքրքրված է այդ ոլորտում փոխշահավետ համագործակցությամբ ու խրախուսում է որակյալ ծառայությունների մատուցմանն ուղղված նախաձեռնությունները:
Անդրադառնալով հանքաքիմիական բնագավառում գործակցության հեռանկարներին` Ա. Գեւորգյանը նկատել է, որ Հայաստանում այս ոլորտում առկա է զարգացման մեծ ներուժ, եւ նոր տեխնոլոգիաների կիրառմամբ, տեղական գործընկերների ներգրավմամբ հնարավոր է լուրջ արդյունքներ ունենալ:
