ՀՀ վարչապետ Նիկոլ Փաշինյանը հայտարարել է, որ Լաչինի միջանցքի անվտանգությունը երաշխավորելու համար պետք է լայն մանդատով միջզգային խաղաղապահներ ընդգրկել՝ դրանով իսկ ստվերելով ռուս խաղաղապահի ուժերի գործունեությունը: Այս մասին Արցախի Աժ-ում հայտարարել է «Արդարություն» խմբակցության պատգամավոր Մետաքսե Հակոբյանը:
Նա դիմեց պետնախարար Գուրգեն Ներսիսյանին՝ նշելով. ««Հաշվի առվելով, որ Նիկոլ Փաշինյանը մշտապես հայտարարում է, որ Արցախի իշխանությունները տեղեկացված են Արցախի մասով բոլոր գործընթացներին, ապա դուք եւս համամի՞տ եք եւ կիսում եք այս մոտեցումը: Նաեւ ըստ ձեզ ինչ պետք է անի ՀՀ իշխանությունը, որ չի անում»:
Ի պատասխան Գուրգեն Ներսիսյանն ասաց. «Հայաստանի իշխանություննների կողմից արվող որևէ հայտարարություն ինձ հետ չի քննարկվել որպես Արցախի իշխանությունների ներկայացուցիչ։ Այն բոլոր անելիքները, որ իրականացվում են մեր կողմից եւ պետք է իրականացվեն ՀՀ իշխանության կողմից, ես պարբերաբար շփումների մեջ եմ իրավական գործընթացներում ներգրավված անձանց հետ։ Այդ շփումների շրջանակներում ներկայացնում եմ իմ առաջարկները։ Ուղիղ հաղորդակցություն Հայաստանի իշխանություննների հետ չունեմ, հետևաբար հաղորդակցում եմ մեր արտաքին գործերի նախարարության հետ»:
Գուրգեն Ներսիսյանի կարծիքով՝ հիմա Արցախի իշխանությունները մեծ անելիք ունեն Արցախում կատարվողի մասին միջազգային հանրությանը տեղեկացնելու մասով։
Մետաքսե Հակոբյանը նկատեց, որ Արցախի իշխանությունները երբևէ չեն հակադրվել Հայաստանի իշխանությունների հայտարարություններին։
«Քանի դեռ Հայաստանի իշխանությունները Արցախի իշխանությունների համաձայնությամբ նման քաղաքականություն են վարում , հետևաբար դուք ներսում այդքան էլ անելիք չունեք, ձեր անելիքը դրսում է»,- նկատեց նա։