Պետք է սպասել բանակցությունների ավարտին. Բանակցությունները դեռ շարունակվում են, դրա համար էլ մեր ԱԳՆ-ի հաղորդագրությունները զուտ տեղեկատվական բնույթի են: Իսկ թե ինչ է անում ադրբեջանական մամուլը, դա պրոպագանդիստական քաղաքականության ենթատեքստը կարելի է տեսնել: Այս մասին նա նշեց այսօր՝ մայիսի 3-ին, ԱԺ-ում՝ լրագրողների հետ զրույցում։
«Բանակցություններն ընթանում են խաղաղության համաձայնագրի տեքստի շուրջ և քանի դեռ դրանք չեն ավարտվել, արդյունքների մասին խոսելը վաղ է», - ասաց Խանդանյանը։
Պատգամավորի խոսքով՝ Հայաստանի խնդիրը տարածաշրջանում համապարփակ խաղաղության հասնելն է, հարաբերությունների կարգավորումը Ադրբեջանի հետ, Լեռնային Ղարաբաղի հայերի իրավունքների և անվտանգության հարցերի հասցեագրումը. «Ենթադրում եմ, որ այս բոլոր թեմաները բանակցությունների սեղանի վրա են», - ասաց պատգամավորը։
Նա նկատեց, որ իրավական ձեւակերպումներ կան, որ դեռ պետք է հստակեցվեն. «Փաստաթուղթն, իհարկե, քաղաքական քննարկման արդյունք է, բայց վերջում միջազգային իրավունքի մասնագետները պետք է նաեւ տեքստի վրա աշխատեն, եթե բանը հասնի ստորագրելու փուլին»:
Խնդանյանը հիշեցրեց հայկական կողմի պնդումը, որ խաղաղության պայմանագիրը կենսունակ լինելու համար պետք են մեխանիզմներ, որոնք կերաշխավորեն այդ պայմանագրի կենսունակությունը. «Դրանք պետք է կողմերը բանակցեն: Մենք պատկերացնում ենք, որ դա պետք է լինի, օրինակ, միջազգային հանրության ակտիվ ներգրավվածությունը՝ լինի միջազգային կազմակերպությունների տեսքով, թե երկրների երաշխավորման տեքսով: Միջազգային հարբերությունների պատմությունն ունեցել է այդպիսի դրվագներ, երբ երկու երկրների հարաբերությունների կարգավորման համաձայնագրերն ունեցել են երաշխավորող կողմեր»: