Հայաստանի տեսանկյունից որեւէ խառնշփոթի հարց չկա, որովհետեւ Հայաստանը հստակ գիտի՝ ինչ է ուզում եւ որեւէ հարթակում միշտ պաշտպանում է այդ սկզբունքները: Այս մասին այսօր՝ մայիսի 3-ին, ԱԺ-ում լրագրողների հետ զրույցում նշեց ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ անդրադառնալով հարցին, թե արդյոք խառնաշփոթ չի առաջանում, երբ հայ-ադրբեջանական բանակցությունները ընթանում են միաժամանակ եւ ՌԴ-ում, եւ ԱՄՆ-ում:
«Դա խաղաղության ապահովումն է տարածաշրջանում, Հայաստանի սահմանների անձեռնմխելիության, տարածքային ամբողջականության, ինքնիշխանության պաշտպանությունն է եւ իհարկե, ԼՂ հայության իրավունքների եւ անվտանգության պաշտպանությունը: Անկախ հարթակներից սրանք են հիմնական հարցերը»,-ասաց նա:
Դիտարկմանը, որ ռուսական կողմից կոշտ հակազդեցություն կա Վաշինգտոնում հայ-ադրբեջանական բանակցությունների վերաբերյալ, եթե հակազդեցությունը խորանա, հաշվարկե՞լ են, թե ինչպես է իրեն պահելու Հայաստանը, Սարգիս Խանդանյանն արձագանքեց. «Ես չեմ հասկանում՝ ինչ է նշանակում կոշտ հակազդեցություն, որովհետեւ Ռուսաստանը բոլոր պաշտոնական մակարդակներով հայտարարում է, որ կողմ է մեր տարածաշրջանում խաղաղության, անվտանգության, կայունության հաստատմանը: Եթե որեւէ գործընկեր երկիր կողմ է դրան, ապա ինչո՞ւ պետք է հակազդի դրան»:
